ފުއްގިރި މައްސަލައިގައި ކޮމިޝަން ނުލިބޭތީ ރައީސް ޔާމީންގެ އެދުމުގެ މަތިން އެއްބަސްވުން ފަސްކުރިން: އަދީބް

އިއްޔެގެ ޝަރީއަތުގައި ފުއްގިރި މުއާމަލާތާ ގުޅޭ ގޮތުން އަދީބު ވިދާޅުވީ އެ ކަމުގައި ފުރަތަމަ އޭނާއާ ވާހަކަދެއްކެވީ ރައީސް ޔާމީންއާ ކަމަށެވެ. އަދި އެ ރަށް ކުއްޔަށް ހިފަން ބޭނުންވާ އިންޑިއާގެ ވަރަށް ވަރުގަދަ ވިޔަފާރިވެރިންތަކެއް އަންނާނެ ކަމަށާއި 2.5 މިލިއަން ޑޮލަރަށް އެ ރަށް އެ މީހުންނަށް ދިނުމުގެ މަޝްވަރާތައް ކުރިއަށް ގެންދިއުމަށް ޔާމީން އެންގެވި ކަމަށް ވިދާޅުވިއެވެ. ހަމައެއާއެކު 2.5 މިލިއަން ޑޮލަރަށް އެ ރަށް ދޫކުރަން ކްލެސިކް ސިޓީ ކުންފުންޏާ މަޝްވަރާކޮށް، އެކްސްޕްރެޝަން އޮފް އިންޓަރެސްޓް ވެސް ހުށަހެޅި ކަމަށް އަދީބު ވިދާޅުވިއެވެ.

2.5 މިލިޔަން ޑޮލަރަށް ރަށް ނެގުމަށް އަނގަބަހުން އެއްބަސްވެފައި އޮއްވާ, ކުންފުނީގެ ފަރާތުން އަހުމަދު ކްރިކް ރިޒާ، ޒިޔަތުއާ ބައްދަލުކުރައްވައި ހަތަރު ލައްކަ ޑޮލަރަށް އަގު ތިރި ކުރެއްވުމަށް އެދިވަޑައިގަތް ކަން މެސެޖް ކުރައްވައި ޒިޔަތު ދެންނެވި ކަމަށް އަދީބު ވިދާޅުވިއެވެ.

ނަމަވެސް, ރ. އަތޮޅުގެ އެހެން ރަށްރަށް ފަސް މިލިއަން ޑޮލަރާ ގާތް ކުރާ އަގުތަކަށް ދޫކޮށްފައިވާތީ ހަތަރު ލައްކަ ޑޮލަރު މާ ބޮޑަށް ވެސް ކުޑަވާނެތީ، އެ އަގުގައި ދޫކުރުމަށް އެމްއެމްޕީއާރުސީން ތައްޔާރުކުރި ސިޓީއެއް ވެސް ނުފޮނުވައި އަދީބު ހިފެހެއްޓެވި ކަމަށް ވެސް އޭނާ ވިދާޅުވިއެވެ.

އަގާ ގުޅޭ ގޮތުން ޔާމީނާ މަޝްވަރާކުރެއްވުމުން، އަގު ތިރިކޮށްގެން މެނުވީ އެމަނިކުފާނަށް ލިބެން އޮތް ކޮމިޝަން ބޮޑު ކުރެވޭނެ ގޮތެއް ނެތް ކަމަށް ޔާމީން އެންގެވި ކަމަށް ވެސް އަދީބު ވިދާޅުވިއެވެ.

އަދީބް ވިދާޅުވީ, ރައީސް ޔާމީން އަންގަވައިގެން އެއްބަސްވުމުގައި ސޮއިކުރުން ދެ ފަހަރެއްގެ މަތިން ފަސްކުރި ކަމަށް އަދީބު ވިދާޅުވި އެވެ. އަދި, ސޮއިކުރުމަށް އެންމެ ފަހުން ނިންމުނު ދުވަހުގެ ހެނދުނު ސޮއިކުރުމަށް އޮތް ނަމަވެސް ސޮއިކުރެވުނީ އެ ދުވަހުގެ މެންދުރުފަހު ކަމަށް އޭނާ ވިދާޅުވި އެވެ.

"ހެނދުނު ދިހައެއް ޖެހީއްސުރެން އަޅުގަނޑުމެން ތިބިން، އެކަމަކު ރައީސް ޔާމީން އެންގެވީ، ކޮމިޝަން ޕޭމަންޓްގެ ކޮންފަމޭޝަނެއް ކްރިކް ދެއްވާނެއޭ، ދެއްވީމައޭ ސޮއިކުރައްވާނީ، ކްރިކް އެ ކޮންފަމޭޝަން ދީފިއޭ، އެ ކަން ރައީސް ޔާމީން އެންގެވުމުން އެ ދުވަހު މެންދުރުފަހު ސޮއިކުރެއްވުނީ،" އަދީބު ވިދާޅުވިއެވެ.