ނުރަސްމީކޮށް ރައީސް ނަޝީދު ވިދާޅުވެދެއްވީ ލަމްހާގެ އެހޯދި އުފާތަކާ

އެމްޑީޕީގެ މެމްބަރުކަމުން ވަކިވެވަޑައިގެން، ލަވަކިޔުންތެރިޔާ ލަމްހާ ލަތީފުގެ އަޑުން ކިޔައިދީފައިވާ "އެ ހޯދި އުފާތަކާ" ލަވަ ޓުވީޓު ކުރައްވައިފި އެވެ.

Ads by Hajj Corporation

ރައީސް ނަޝީދުގެ ނުރަސްމީ ޓުވިޓާ އެކައުންޓުން މީގެ ކުޑަ އިރުކޮޅެއް ކުރިން ވަނީ ދިއެފްއެމްއިން ގެނަސްދިން "އެންމެ ރީތި" ސީޒަން 2 ގައި ލަމްހާ ކިޔާދީފައިވާ މި ލަވައިގެ ޔޫޓިއުބް ލިންކެއް ޓުވީޓު ކުރައްވައިފަ އެވެ. އިތުރަށް އެއްވެސް އެއްޗެއް ވިދާޅުވެފައެއް ނުވެ އެވެ.

ބެލެވޭ ގޮތުގައި ރައީސް ނަޝީދު މި ލަވައިން ވަނީ އެމްޑީޕީން ވަކިވުމުގެ ހިތާމަ ފާޅު ކުރައްވައިފަ އެވެ. އެލަވައިގައި ޅެންވެރިޔާ ބުނެދީފައިވަނީ ކުރީގެ ހަނދާންތަކުގެ ފޮނިކަމާއި، އެ ވަގުތުތަކުގެ ހިތްގައިމުކަމެވެ. އެހެންނަމަވެސް މިހާރު އެ ހަނދާންތައް މިލާގޮސް މުޅިން ބާކީވެފައި ހުރިކަމަށް ލަވައިގައި ޅެންވެރިޔާ ބުނެދެ އެވެ.

2004 ވަނަ އަހަރު އެމްޑީޕީ އުފެދުނީއްސުރެއް އެޕާޓީގެ އެންމެ އިސް ލީޑަރެއްގެ ގޮތުގައި މަސައްކަތް ކުރައްވަމުން ގެންދެވި ރައީސް ނަޝީދުގެ ބާރު މުޅި ޕާޓިން ވަނީ ކެނޑިފަ އެވެ. އެމްޑީޕީގައި މިހާތަނަށް އުފެދުނު އެންމެ މަގްބޫލު ޝަހުސިއްޔަތަކީ ރައީސް ނަޝީދަށް ވާއިރު އެމަނިކުފާނު އަމިއްލަފުޅަށް ޕާޓީން ވަކިވީ، ޕާޓީގެ ލީޑަޝިޕުން އެމަނިކުފާނު މުޅިން "ބާކީ" ކޮށްލައި ގިނަ ދުވަސްތަކެއް ވެފައިވަނިކޮށެވެ.

ޕާޓީން ވަކިވިއިރު އެމަނިކުފާނު ހުންނެވީ ޕާޓީގެ ރައީސްގެ މަގާމުގަ އެވެ. އެހެންނަމަވެސް މިދިޔަ ހަތަރު އަހަރު ދުވަހު އެމްޑީޕީގެ އިސް ލީޑަރުކަން ކުރެއްވީ ރައީސް އިބްރާހިމް މުހައްމަދު ޞާލިހެވެ. ޕާޓީ ކޮންޓްރޯލް ކޮށްފައިވަނީވެސް ރައީސް ޞާލިހެވެ.

ބެލެވޭ ގޮތުގައި ރައީސް ނަޝީދު ދެން ގުޅިވަޑައިގަންނަވާނީ މިހާރު އުފެއްދުމަށް މަސައްކަތް ކުރަމުންދާ "ދަ ޑިމޮކްރެޓްސް" އާ އެވެ. މިހާތަނަށް ރަސްމީކޮށް ވަކި އެއްޗެއް ވިދާޅުނުވި ނަމަވެސް އެޕާޓީގެ ޓިކެޓުގައި ރައީސް ނަޝީދު ރައީސްކަމަށް ކުރިމަތިލައްވައިފާނެ ކަމަށް ބެލެވެ އެވެ. އެހެންނަމަވެސް އަދި އިލެކްޝަންސް ކޮމިޝަނުން "ދަ ޑިމޮކްރެޓްސް" އުފެއްދުމުގެ ހުއްދައެއް ނުދެ އެވެ.