އޭސީސީއަށް ހާޒިރު ކުރީ، ތާއީދު ކަނޑުވައިލަން: ނާޒިމް

އެމްއެމްޕީއާރުސީ ބޮޑު ހިޔާނާތުގެ މައްސަލައިގައި އެމްއެންޕީގެ ރިޔާސީ ކެންޑިޑޭޓު، އަދި މަޖިލީހުގެ ދަނގެތި ދާއިރާގެ މެމްބަރު މުޙައްމަދު ނާޒިމް، އެންޓި ކޮރަޕްޝަން ކޮމިޝަން (އޭސީސީ)އަށް ހާޒިރުކޮށް، ސުވާލުކޮށްފިއެވެ.

Ads by STELCO

އެނގިފައިވާ ގޮތުގައި، އިއްޔެއާ މިއަދު ވެސް، ނާޒިމް އޭސީސީ އަށް ހާޒިރުކޮށް ސުވާލުކޮށްފައިވެއެވެ.

މިކަމާ ގުޅިގެން ނާޒިމް ނެރުއްވި ބަޔާނެއްގައި ވިދާޅުވީ އޭނާއަކީ މިއަހަރު ބޭއްވޭ ރިޔާސީ އިންތިޚާބުގައި ވާދަކުރައްވާ ފަރާތެއް ކަމަށެވެ.

އެމްއެންޕީގެ ރިޔާސީ ޓިކެޓާ ހަވާލުވެ ރިޔާސީ އިންތިހާބަށް ކެމްޕެއިން ކުރަމުން ދަނިކޮށް އަދި ރިޔާސީ އިންތިޚާށް ކުޑަތަންވެފައި ވަނިކޮށް، މީގެ ނުވަ އަހަރު ކުރިން ހިނގާފައިވާ ކަމަށް ބުނާ މައްސަލައެއްގައި އޭސީސީއަށް ހާޒިރު ކުރީ ސިޔާސީ ގޮތުން ކުރަމުން އަންނަ މަސައްކަތް ރައްޔިތުން ބަލައިގަންނަމުންދާތީ، އަގުވައްޓާލައި ރައްޔިތުން ކުރަމުން އަންނަ އިތުބާރާއި ތާއީދު ކަނޑުވާލުމުގެ ނިޔަތުގައި ސިޔާސީ ފަރާތްތަކެއްގެ ނުފޫޒުން ކަމަށެވެ.

"މިއީ ސީދާ ގޮތުން މި އަހަރުގެ ރިޔާސީ އިންތިޚާބަށް ނުފޫޒު ފޯރުވުމަށް ސަރުކާރު ފަހަތުގައި އޮވެގެން ކުރައްވާ ކަމެއް ކަމުގައިވެސް އަޅުގަނޑު ދެކެމެވެ،" ނާޒިމްގެ ބަޔާނުގައި ވިދާޅުވިއެވެ.

ނާޒިމްގެ ބަޔާނުގައި އޭނާއަކީ 30 އަހަރަށްވުރެ ގިނަ ދުވަހު އެކި ފެންވަރުގެ މަޤާމުތަކުގައި ދިވެހި ދަޢުލަތަށް ޚިދުމަތްކޮށްފައިވާ މީހެއްކަން ފާހަގަކުރެއްވިއެވެ.

އޭނާ ވިދާޅުވީ، މިހައިތަނަށް އައިއިރު ވެސް، ޚިޔާނާތުގެ މައްސަލައެއް ދުވަހަކުވެސް ޖެހިފައިނުވާ ކަމަށެވެ. އެހެން ކަމުން މިނިވަން މުއައްސަސާތައް މެދުވެރިކޮށް ސަރުކާރުން ހިންގާ މިފަދަ ޢަމަލުތަކަކީ ދިވެހި ރައްޔިތުންވެސް ޤަބޫލުކުރާނޭ ކަމެއް ނޫން ކަމުގައި ދެކޭ ކަަމަށެވެ.

އަސި ދިވެހި ދައުލަތުގެ ކަންކަން މިއަދު ހިނގަމުންދާ ގޮތުން މިނިވަން މުއައްސަސާތަކަށް ޤާނޫނުއަސާސީ ގައި ބުނާ ގޮތަށް މިނިވަންކަމާ އެކު މަސައްކަތް ކުރުމުގެ ފުރުސަތު ގެއްލި އެ ކޮމިޝަންތަކުން ކުރަމުންދާ މަސައްކަތްތަކަށް ސަރުކާރުން ނުފޫޒު ފޯރުވަމުންދާތީ، ކަންބޮޑުވެލައްވާ ކަމުގައިވެސް ވިދާޅުވިއެވެ.