މުހިންމު މައްސަލަތައް ނިމެންދެން، މަޖިލީހުގެ ދައުރު ދަންމައިލުމަށް އެދިއްޖެ
ރައްޔިތުންގެ މަޖިލީހަށް ހުށަހެޅިިފައިވާ މުހިންމު މައްސަލަތައް ނިމެންދެން މަޖިލީހުގެ މިދައުރު ދަންމާލުމަށް މަޖިލީހުގެ މެޖޯރިޓީ ލީޑަރު އަދި މަޖިލީހުގެ ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް އެދިވަޑައިގެންފިއެވެ.
އަދި ބަހުސްކުރުމަށްފަހު ދާއިމީ ކޮމިޓީތަކުގައި މެންބަރުން ހިމެނިވަޑައިގަންނަވާނެ ގޮތަށް އިސްލާހު ހުށަހެޅުއްވުމަށް މެންބަރުންނަށް މުއްދަތެއް ދިނުމަށްފަހު ހުށަހަޅުއްވާ އިސްލާހަށް އިސްލާހު ހުށަހެޅުއްވުމަށް ފުރުސަތުދީ، އެގޮތުން ހުށަހަޅުއްވާ އިސްލާހުތަކަށް ވޯޓަށް އެހުމާއި، މަޖިލީހުގެ ދާއިމީ ކޮމިޓީތަކުގައި ސިޔާސީ ޕާޓީތަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތާމެދު ގޮތެއް ނިންމުމަށް އޮންނާނީ ދެން އޮންނަ މަޖިލީހުގެ ޖަލްސާއެއްގައި ކަމަށްވެސް އެޖެންޑާގައި ބުނެފައިވެއެވެ.
އަސްލަމް ވިދާޅުވީ މަޖިލީހުގެ ބައެއް ކޮމިޓީތަކަކީ ދާއިމީ ކޮމިޓީތަކެއް ކަމަށާއި އޭގެން ބައެއް ކޮމިޓީތަކަކީ މަޖިލިސް ޗުއްޓީގައި އޮންނައިރުވެސް ކުރިއަށްދާ ކޮމިޓީތަކެއް ކަމަށެވެ. އެހެންކަމުން ކޮމިޓީތަކުގެ މައްސަލަ ކޮންމެވެސް އެއްގޮތަކަށް ނިމިފައި އޮތުމަކީ މުހިންމު ކަމެއް ކަމަށްވެސް ވިދާޅުވިއެވެ.
އަސްލަމް އިތުރަށް ވިދާޅުވީ ޤަބޫލު ނުކުރެވުނު ކަމުގައި ވީނަމަވެސް، އެޖެންޑާއަށް އިޙްތިރާމު ކުރުމުގެ ގޮތުން މިއަދު އިތުރު ޖަލްސާއެއް ބާއްވައިދިނުމަށް އެދޭކަމަށެވެ.
އަދި މަޖިލީހުން އެޖެންޑާގައި ހިމެނެންޖެހޭ މުހިންމު މައްސަލަތައް ނިމެންދެން މަޖިލިސް ދައުރު ދަންމައިދިނުމަށް ވަނީ އެދިވަޑައިގެންފައެވެ.
އަސްލަމްގެ މިވހުށަހެޅުއްވުމަށް އެމްޑީޕީއަށް ނިސްބަތްވާ މެންބަރުންވަނީ ތާއީދުކުރައްވާފައެވެ.
Ads by STO
