ދިވެހި ދެމަފިރިއަކު ކައިވެނީގެ ހަފްލާގައި ހެދުން އެޅިގޮތް، ވަރަށް ވެސް ތަފާތު

ކޮންމެ މީހަކުވެސް ދިރިއުޅުމުގައި އެންމެ އުފާވާނެ އެއް ދުވަހަކީ އަލަތު ކައިވެނި ކުރެވޭ ދުވަސް ކަން ޔަގީނެވެ. އެ އުފާވެރިކަން ފާހަގަ ކުރުމަށްޓަކައި ބާއްވާ ކައިވެނީގެ ހަފްލާ ކުލަގަދަ ކޮށް ބޭއްވުމަކީ ގިނަ ބަޔަކު ދެކޭ ހުވަފެނެއް ވެސް މެއެވެ. ކައިވެނީގެ ހަފްލާ އެހެން މީހުން ބާއްވާ ގޮތާއި ތަފާތުކޮށް ބޭއްވުމަކީ ވެސް ބައެއް މީހުން ބޭނުންވާ ކަމެކެވެ.

Ads by Hajj Corporation

ކައިވެނީގެ ހަފްލާ އެކި ގޮތަށް އެކި މީހުން ބޭއްވުމަށް ބޭނުންވާއިރު، ދިވެހި ރާއްޖޭގައި އަލަށް ކައިވެނި ކުރި ދެމަފިރިއަކު މިވަނީ ވަރަށް ތަފާތު ކަމެއް ކޮށްފައެވެ. ކައިވެނީގެ ހަފްލާގައި މި ދެމަފިރިން ލާފައި ވަނީ ތަފާތު ހެދުމެއްގައެވެ.

އިއްޔެ ކައިވެނި ކުރި މި ދެމަފިރިން ވެސް ކައިވެނީގެ ހަފްލާގައި ލައިގެން ހުރި ހެދުމަކީ ސާރު (ޑައިނަސޯ) ކޮސްޓިއުމެކެވެ. ގިނަ ބަޔަކު ރީތި ވެޑިން ޑްރެސް އެއްގައި ކައިވެނީގެ ހަފްލާގައި ތިބޭއިރު މި ދެމަފިރިން މި ފަދަ ހެެދުމެއް ކައިވެނީގެ ހަފްލާގައި ލުމަށް ހިޔާރު ކުރީ ކޮން ސަބަބަކަށް ބާވައެވެ.

ނަން ހާމަ ނުކުރުމަށް އެދި އިއްޔެ ކައިވެނި ކުރި ފިރިހެން މީހާ “ދެން” އާއި ވާހަކަ ދައްކަމުން ބުނީ، މި ކޮސްޓިއުމަކީ އޭނާ އަބަދުވެސް ބޭނުން ކުރާ ކޮސްޓިއުމެއް ކަމުގައެވެ. އެގޮތުން ކުޑަކުދިންގެ އުފަންދުވަހުގެ ޕާޓީ ތަކަށާއި އަދި ހިތާނީ ހަފްލާތަކަށް ވެސް މި ކޮސްޓިއުމްގައި އޭނާ ގޮސްފައިވާނެ ކަމުގައި އޭނާ ފާހަގަ ކުރިއެވެ. އަދި “ސާރު” ގެ ނަމުގައި އޭނާ ވަނީ ފޭސްބުކް ގައި ޕޭޖެއް ހަދައި އޭނާ ބައިވެރިވާ ކަންކަމުގެ ފޮޓޯ އަދި ވީޑިއޯ ވެސް ހިއްސާ ކޮށްފައެވެ.

މި ފިރިހެން މީހާ މި ކޮސްޓިއުމުގައި ދިޔައީ ޕާޓީ ތަކަށް އެކަންޏެއް ނޫނެވެ. އޭނާ ވަނީ މިދިޔަ އަހަރުގެ ދިރާގު ރޯޑް ރޭސް ވެސް މި ކޮސްޓިއުމްގައި ނިންމާފައެވެ. މިފަދަ ބޮޑު ކޮސްޓިއުމެއްގައި 5 ކިލޯމީޓަރަށް ދުވި ވާހަކަ ބުނުމުން އަޅުގަނޑުވެސް ހައިރާން ވިއެވެ. ނަމަވެސް ހަގީގަތަކީ އޭނާ އެ ރޭސް ނިންމީ ހަމަ އެކޮސްޓިއުމްގައި ހުރެ ކަމެވެ.

ކައިވެނީގެ ހަފްލާގައި މިގޮތަށް ހެދުން އެޅުމަށް ނިންމީ ކޮން ސަބަބަކާހުރެ ތޯ ކުރި ސުވާލަކަށް ޖަވާބު ދެމުން އޭނާ ބުނީ، އެ ދެމަފިރިން ވެސް ބޭނުންވީ ދެމަފިރިންގެ ކައިވެނީގެ ހަފްލާވެސް ވަރަށް “މެމޯރެބަލް” ހަފްލާއަކަށް ވާން ކަމަށެވެ. އަދި ފުރަބަންދުގެ ކުރިން މި ކައިވެނި ކުރުމަށް ޕްލޭން ކުރީ ވަރަށް ކުލަގަދަކޮށް ކައިވެނީގެ ހަފްލާ ބޭއްވުމަށް ކަމަށްވެސް އޭނާ ބުންޏެވެ

ފުރަބަންދުގެ ސަބަބުން ކަންތައްތައް ދިޔައީ މި ދެމަފިރިން ބޭނުންވާ ގޮތަކަށް ނޫނެވެ. އެގޮތުން ކައިވެނި ކުރުމުގެ ކަންކަން ވެސް ބަދަލު ވީ އޮންލައިންކޮށް ކުރާ ގޮތަަށް ކަމަށާއި ކައިވެނީގެ ހަފްލާ ވެސް އެންމެ ބޭނުންވާ ގޮތަށް ބޭއްވުމުގެ ފުރުސަތު ނުލިބުނު ކަމުގައި އޭނާ ބުންޏެވެ. އެހެން ނަމަވެސް އެ ދެމަފިރިން ބޭނުންވީ އެ ހަފްލާ އަކީ އެހެން ހަފްލާތަކާއި ތަފާތު ހަފްލާއަކަށް ހަދަން ކަމުގައި ވެސް އޭނާ ބުންޏެވެ.

ތަފާތު ގޮތަކަށް ކައިވެނީގެ ހަފްލާ ކުރިއަށް ގެންދާނެ ގޮތެއް ދެމަފިރިންވެސް ދިޔައީ ވިސްނަމުންނެވެ. ވިސްނަމުން ދަނިކޮށް ކައިވެނި ކުރި ފިރިހެން މީހާ މި ހިޔާލު ސިކުނޑިއަށް  އައުމުން އަންހެނުން ކައިރީގައިވެސް އެ ހިޔާލު ހިއްސާ ކުރި ކަމަށް އޭނާ ބުންޏެވެ. އަބަދުވެސް ކުރާ ކޮންމެ ކަމެއްގައި ވެސް އަންހެނުންގެ ސަޕޯޓް ލިބޭ ކަމަށް ފާހަގަކުރަމުން އޭނާ ބުނީ މި ކަމަށް ވެސް އަންހެނުންގެ ފަރާތުން ސަޕޯޓު ލިބުނު ކަމަށެވެ. އަދި އެ ކޮސްޓިއުމްގައި ކައިވެނީގެ ހަފްލާގައި ތިބުމަށް ނިންމި ކަމުގައި އޭނާ ބުންޏެވެ.

މި ދެމަފިރިންގެ ކައިވެނީގެ ހަފްލާ ބާއްވާފައިވަނީ ހަމަ އެކަނި އާއިލާ އާއި ރައްޓެހިންނަށެވެ. އެޗްޕީއޭގެ ގައިޑްލައިންތައް ބުނާ ގޮތުން ނަމަ ގިނަ ބަޔަކު ބައިވެރިވެގެން ކައިވެނީގެ ހަފްލާއެއް މި ހާލަތުގައި ނުބޭއްވޭނެއެވެ.

މި ކައިވެނީގެ ހަފްލާ ބޭއްވުމުގައި ގިނަ ބައެއްގެ އެހީތެރިކަން ލިބުނުކަން ފާހަގަ ކުރަމުން ކައިވެނި ކުރި ފިރިހެން މީހާ ބުނީ، ކައިވެނީގެ ރަން ތައްޔާރު ކޮށްދިން “ވެޑިން މަހްރު” އަށް ހާއްސަ ޝުކުރެއް އަދާ ކުރާ ކަމަށެވެ.

ކައިވެނީގެ ހަފްލާގައި ބޮޑެތި އަދި ޝާހީ ހެދުންތައް ލުމަށް ގިނަ ބަޔަކު ލޯބި ކުރާ އިރު މި ދެމަފިރިން މި ހިޔާރު ކުރީ ވަރަށް ތަފާތު ގޮތެއް ކަން ޔަގީނެވެ. އަދި މި ހަފްލާ ހަމަ ގައިމު ވެސް އެ ދެމަފިރިން ބޭނުންވި ފަދަ “މެމޯރިއަލް” ކައިވެނީގެ ހަފްލާއަކަށް ވީކަން ވެސް ގައިމެވެ.