ކައްދޫ އެއަރޕޯޓް ކޮމްޕެނީ ލިމިޓެޑުގެ ޑިރެކްޓަރުންގެ ބޯޑަށް ކާނަލް ޝަރީފް!
ކައްދޫ އެއަރޕޯޓް ކޮމްޕެނީ ލިމިޓެޑުގެ ޑިރެކްޓަރުންގެ ބޯޑުގެ މެންބަރުކަމުގެ މަޤާމަށް އައްޑޫސިޓީ މަރަދޫ ފޭދޫ ލަކްސަމީވިލާ ކާނަލް އަޙްމަދު ޝަރީފް އައްޔަން ކުރައްވައިިިފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން މައުލޫމާތު ދެއްވި ގޮތުގައި ކާނަލް ޝަރީފް މި މަޤާމަށް ޢައްޔަނުކޮށްފައިވަނީ ޖޫން 22 ވަނަ ދުވަހު ފިނޭންސް މިނިސްޓްރީގައި ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ކާނަލް ޝަރީފަށް މަޤާމުގެ ލިޔުން ޙަވާލުކޮށްދެއްވީ ޕީ.ސީ.ބީގެ ރައީސް ޢާޞިމް މުޙައްމަދެވެ.
ކާނަލް ޝަރީފު މީގެ ކުރިން އަދާ ކުރެއްވި ވަޒީފާތަކުގެ ތެރޭގައި ދިވެހިރާއްޖޭގެ ޤައުމީ ދިފާޢީ ބާރު އެމް.އެން.ޑީ.އެފްގެ އެކި މަޤާމްތަކުގައި އިޙްލާސްތެރިކަމާއެކު ޚިދުމަތް ކުރައްވާ ކައްދޫ އެއަރޕޯޓް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރުގެ މަޤާމް ހިމެނެއެވެ. އަދި އެކުންފުނީގެ ޑިރެކްޓަރުންގެ ބޯޑަށް ޢައްޔަނުކުރެއްވުމާއި ހަމައަށް އެބޭފުޅާ ހުންނެވީ މިނިސްޓްރީ އޮފް ޑިފެންސްގެ ޑިޕާޓްމަންޓް އޮފް ސްޓްރެޓެޖިކް ސެކިއުރިޓީ އެންޑް އެސެސްމަންޓްގެ ޕްރިންސިޕަލް ޑިރެކްޓަރކަމުގެ މަޤާމުގައެވެ.
ކާނަލް ޝަރީފް ވަނީ އެމެރިކާގެ މެރިން ކޯރ ޔުނިވަރސިޓީއިން މާސްޓަރސް އިން މިލިޓަރީ ސައިންސް ޙާޞިލުކުރައްވާފައެވެ. އަދި ދުނިޔޭގެ އެކި ޤައުމުތަކުން މިލިޓަރީ ދާއިރާއިންނާއި މެނޭޖްމަންޓް ދާއިރާއިން ތަމްރީންތައް ފުރިހަމަކުރައްވާފައެވެ.
Ads by STO
