ރައީސް ޔާމީންގެ ޝަރީއަތުގެ އަޑުއެހުމެއް އާދިއްތަ ދުވަހަށް ތާވަލުކޮށްފި
ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުގައި ކުރިއަށްގެންދާ ޝަރީއަތުގެ އަޑުއެހުމެއް އާދީއްތަ ދުވަހަށް ތާވަލު ކޮށްފިއެވެ.
ރ. ފުއްގިރި ކުއްޔަށް ދިނުމުގެ މުޢާމަލާތާ ގުޅިގެން ކުރީގެ ރައީސް ޔާމީންގެ މައްޗަށް ކުރިޔަށްދާ ރިޝްވަތާއި މަނީ ލޯންޑަރިންގެ ތުހުމަތުގައި ހިނގަމުންދާ ޝަރީޢަތުގެ އަޑުއެހުން އާދީއްތަ ދުވަހަށް ކްރިމިނަލް ކޯޓުގައި ތާވަލު ކޮށްފައިވަނީ ހެނދުނު 09:00 އަށެވެ.
މި މައްސަލައިގައި މިހާރު ކުރިއަށްދަނީ ހެކިބަސް ނެގުމެވެ. މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަނީ ދިވެހި ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓަރީގައި ޑިޖިޓަލް އެވިޑެންސް އެގްޒެމިނަރެއްގެ ގޮތުގައި މަސައްކަތް ކުރައްވަމުން ގެންދަވާ ފަރާތެއްގެ ހެކިބަހާއި، މި މައްސަލައާ ގުޅިގެން ކިތާބީ ހެކީގެ ގޮތުގައި ހުށައަޅާފައިވާ ފިންގަރ ޕްރިންޓް އެނާލިސިސް ރިޕޯޓާއި ގުޅިގެން ޚަބީރެއްގެ ގޮތުގައި ހާޒިރު ކުރެއްވި ފަރާތުގެ ހެކިބަސް ނަގާފައެވެ.
މި މައްސަލާގައި ދައުލަތުން ހުށަހެޅި ހަ ހެއްކެއްގެ ހެކިބަސް މިހާތަނަށް ވަނީ ނަގާފައެވެ. އޭގެތެރޭގައި ކުރީގެ ނައިބު ރައީސް އަހުމަދު އަދީބު އަދި އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތުގެ ހެކިބަސްވެސް ނަގާފައިވެއެވެ.
