މާލެއަށް 264 ބަނގުރާފުޅި އެތެރެކުރި މީހާގެ ޖަލު އަދަބު ޖޫރިމަނާއަކަށް ބަދަލުކޮށްފި
މާލެއަށް 264 ބަނގުރާފުޅި އެތެރެކުރި މީހާގެ ޖަލު އަދަބު ޖޫރިމަނާއަކަށް ބަދަލުކޮށްފިއެވެ.
ކްރިމިނަލް ކޯޓުން މިގޮތަށް ޙުކުމްކޮށްފައިވަނީ، މި މައްސަލައިގައި ދައުލަތުން ދައުވާ އުފުލާފައިވާ މުޢާވިޔަތު އަޙްމަދު ޞަމީރު އޭނާ އެ ބަންގުރާ ފުޅިތައް ރާއްޖެ އެތެރެކުރިކަމަށް އިޢުތިރާފުވުމުންނެވެ.
މިއީ އެކަށީގެންވާ ޝައްކެއް ނެތް މިންވަރަށް މުޢާވިޔަތު އަޙްމަދު ޞަމީރުގެ މައްޗަށް ސާބިތުވާ މައްސަލައެއްކަމަށް ޝަރީއަތުން ކަނޑައަޅާފައިވާއިރު، އޭނާގެ މައްޗަށް ކަނޑައެޅުނު ޖަލު އަދަބު ޖޫރިމަނާގެ އަދަބަކަށް ބަދަލުކުރުމާމެދު އިއުތިރާޒެއް ނެތްކަމަށް ދަޢުލަތުވެސް ފާހަގަކޮށްފައިވެއެވެ.
މި ކުށުގެ އަސާސީ އަދަބަކީ 2 މަހާއި 12 ދުވަހުގެ މުއްދަތަކަށް ޖަލަށް ލުމަށް ކަމަށްވާއިރު، އެ ކުށަށް އޭނާ އިއުތިރާފުވެފައިވާތީ އަދަބުގެ އަސާސީ މިންގަނޑު ދަށް ކުރުމުން ކަނޑައެޅޭ އަދަބަކީ 1 މަހާއި 13 ދުވަހުގެ ޖަލު ޙުކުމެކެވެ. އަދި އޭނާގެ މައްޗަށް ޖަލު އަދަބު ނޫން އަދަބެއް ކަނޑައެޅުމުގެ މަސްލަޙަތު މާ ބޮޑުކަމަށް ޝަރީޢަތުން ފާހަގަކޮށްފައިވާއިރު، ދައުލަތުންވެސް އެކަމަށް އިއުތިރާޒު ނުކުރާތީ އޭނާގެ ޖަލު ޙުކުމް ޖޫރިމަނާގެ އަދަބަކަށް ބަދަލުކޮށް، ޖޫރިމަނާއަށް ކަނޑައަޅާފައިވާ 8600 ރުފިޔާ ދެމަސް ދުވަހުގެ ތެރޭގައި މީރާއަށް ދެއްކުމަށް އޭނާގެ މައްޗަށްވަނީ ޙުކުމްކޮށްފައެވެ.
