ގުރައިދޫ ކައުންސިލުން އެރަށު ހިއްކި ބިމުން ރައްޔިތުންނަށް ގޯތި ނުދީ އޮތް އޮތުމާމެދު ރައީސް ޞާލިޙް ހިތާމަ ފާޅުކުރައްވައިފި
ކ. ގުރައިދޫ ކައުންސިލުން އެރަށު ހިއްކި ބިމުން ރައްޔިތުންނަށް ގޯތި ނުދީ އޮތް އޮތުމާމެދު ރައީސް ޞާލިޙް ހިތާމަ ފާޅުކުރައްވައިފިއެވެ.
2023 ވަނަ އަހަރުގެ ރިޔާސީ އިންތިހާބުގެ ކެމްޕެއިން ތެރެއިން މިހާރު ކ. ގުރައިދޫ ދާއިރާއަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ގުރައިދޫއަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުން ރައީސް ޞާލިޙް ވިދާޅުވީ ރައްޔިތުން ބޭނުން ވަނީ ތަރައްގީ ކަމަށާއި އެއީ ހިތަށް ފިނިކަން ގެނެސްދޭ ކަމެއް ކަމަށެވެ.
އަދި 2018 ވަނަ އަހަރު ވެރިކަމަށް ވަޑައިގެންނެވިއިރު ގުރައިދޫ ދާއިރާ އަށް ވީ ވަޢުދުތަކެއް ވެސް ހުންނާނެ ކަމަށާއި އޭގެތެރެއިން އެންމެ މުހިންމު އެއް ވަޢުދަކީ ރަށުގެ ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ ގޮތުން ބިން ހިއްކުމުގެ ވަޢުދުކަމަށް ރައީސް ޞާލިޙް ފާހަގަކުރެއްވިއެވެ.
ގުރައިދޫ އަށް ސަރުކާރުން ވީ ވަޢުދުތައް ފުދިގެން ދާކަމަށާއި، ނަމަވެސް މިއަދާއި ހަމައަށް އައިއިރުގައި ވެސް ރަށު ކައުންސިލުން ރައްޔިތުންނަށް ގޯތި ދޫކުރަން ނޫޅޭތީ ރައީސް ވަނީ ކަންބޮޑުވުންފާޅު ކުރައްވާފައެވެ.
"މިހާތަނަށް އައިއިރުގައި ވެސް އެކަން ނުކޮށް [ހިއްކި ބިމުން ގޯތި ނުދީ އޮތުން] ކައުންސިލުން އޮތް އޮތުމަކީ އަޅުގަނޑު ހިތާމަ ކުރާ ކަމެއް. ސަރުކާރުން އެއޮތީ ބޮޑު ބިމެއް ހިއްކައިދީފައި. ރައްޔިތުން މިރަށުން ބޯހިޔާވަހިކަން ބޭނުންވޭ. ގޯތި ބޭނުންވޭ. ގޯތި ނުދެވޭންވީ އެއްވެސް ސަބަބެއް މިރަށުގައި ނެތް. އަޅުގަނޑު ދަންނަވާނީ އެކަން ކައުންސިލަށް ނުކުރެވޭ ކަމަށް ވަންޏާ ގެންނަންޖެހޭ ބަދަލެއް ގެނެސްގެން ވެސް ގާނޫނަށް ބަދަލު ގެނެސްގެން ވެސް މިރަށުގެ ރައްޔިތުންނަށް ބޯހިޔާވަހިކަން ފޯރުކޮށްދޭން ޖެހޭ،" ރައީސް ޞާލިޙް ވިދާޅުވިއެވެ.
މީގެ އިތުރުން، ރައްޔިތުން ބޭނުންވާ ކަންކަމަށް ހުރަސް އަޅާ ބަޔަކަށް ޖާގަ ނުދޭން ގުރައިދޫގެ ރައްޔިތުން ދެން ދަންނާނެ ކަމަށާއި ރައްޔިތުންގެ ޙާދިމުންނަށް އިންތިހާބު ކުރަން ބޭނުން ވަނީ އެ ރައްޔިތުންގެ މުހުތާދުތައް ފުއްދައި ދޭ ބަޔަކުކަމަށްވެސް ރައީސް ޞާލިޙްގެ ވާހަކަފުޅުގައި ވިދާޅުވިއެވެ.
ދެވަނަ ދައުރަކަށް ރައީސް ޞާލިޚް އިންތިހާބުވެވަޑައިގެންފި ނަމަ، ގުރައިދޫއަށް ބައެއް ކަންކަން ކޮށްދެއްވާނެ ކަމަށް ވައުދުވެވަޑައިގަންނަވަމުން އެމަނިކުފާނު ވިދާޅުވީ، އެރަށުގެ ބޯހިޔާވަހިކަމަށް ދިމާވެފައިވާ މައްސަލަތައް ހައްލު ކުރުމަށް ފްލެޓު ނޫނީ ރޯ ހައުސް އަޅުއްވައި ދެއްވާނެ ކަމަށާއި ޒުވާނުން ބޭނުންވާ ވަޞީލަތްތަކާއެކު ޒުވާނުންގެ މަރުކަޒުވެސް ފުރިހަމަ ކޮށްދެއްވާނެ ކަމަށެވެ.
Ads by STO
