ރާއްޖޭގެ ޖީޑީޕީއަށް ބަލާއިރު މީހެއްގެ ބޮލަކަށް 12 ހާހަށްވުރެ ގިނަ ޑޮލަރު ޖެހޭއިރު އެއްވެސް ރައްޔިތަކު އަސާސީ ޚިދުމަތްތަކުން މަހްރޫމްވެގެން ނުވާނެ: ރައީސް ޞާލިޙް

ރާއްޖޭގެ ޖީޑީޕީއަށް ބަލާއިރު މީހެއްގެ ބޮލަކަށް 12 ހާހަށްވުރެ ގިނަ ޑޮލަރު ޖެހޭއިރުގައި ރާއްޖޭގެ އެއްވެސް ރައްޔިތަކު އަސާސީ ޚިދުމަތްތަކުން މަހްރޫމްވެގެން ނުވާނެކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ.

Ads by Sosun Fihaara

2023 ވަނަ އަހަރުގެ ރިޔާސީ އިންތިހާބުގެ ކެމްޕެއިން ތެރެއިން މ އަދި ވ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މ. ރަތްމަންދޫއަށް ވަޑައިގެން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ 2022 ގައި ހެދި ބޯހިމެނުމުން ދައްކާގޮތުގައި އެ ރަށުގައި ދިރިއުޅެނީ 100 އާއި 118 މީހުންނާ ދޭތެރޭގެ އަދަދެއް ކަމަށާއި މިފަދަ ކުދި އާބާދީތަކަށް ކުރީގެ ސަރުކާރުތަކުން މުޅިންހެން އިޙްމާލުވެފައި އޮތްކަމަށެވެ.

އެގޮތުން، މި ސަރަހައްދުން ދިވެހިރާއްޖެއަކީ، ޖީޕީގެ އަދަދު އެންމެ މަތިން ބޮލަކަށް ޖެހޭ ޤައުމުކަމަށާއި، ސަރުކާރާއި ދައުލަތަށް މި ލިބޭ އާމްދަނީ ހަމަހަމަކަމާއެކު ރައްޔިތުންނަށް ފޯރުކޮށްދިނުމަށްޓަކައި މި ސަރުކާރުން ޖަޒީރާ ރާއްޖެ މެނިފެސްޓޯއެއް ހިފައިގެން ނުކުންނަން ޖެހުނީ އެ ސަބަބަށްޓަކައިކަމަށް އެމަނިކުފާނު ވިދާޅުވިއެވެ.

ރަތްމަންދޫގެ އާބާދީއަކީ ކުޑަ އާބާދީއަކަށްވުމުން، އެހެން ސަރުކާރުތަކަށް އެ ރަށުގެ އާބާދީން މާބޮޑު މަންފާއެއް ނުކުރާނެކަމަށް ހީވެފައި އޮތުމުން، އެފަދަ ރަށްރަށަށް އިޙްމާލުވެފައިވީނަމަވެސް، މި ސަރުކާރުން ބޭނުންވަނީ ރައްޔިތުންގެ ޚިޔާލާއެކު ކުރިއަށްދާން ކަމަށާއި އެހެންވެ، ކުޑަ އާބާދީ ރަށްތައް ވެސް މުހިންމު ކަމަށް ރައީސް ވިދާޅުވިއެވެ

"އަޅުގަނޑުމެން މިތިބީ، މިނިވަންކަމާއި ޚިޔާލުފާޅު ކުރުމާއި އެއްވެއުޅުމާއި މި ހުރިހާ ކަމަކަށް ތަންދީގެން ކުރިއަށްދާން. ރައްޔިތުންގެ އަޑުއަހައިގެން ކުރިއަށްދާން. އެހެންވެ މިފަދަ ކުދިކުދި ރަށްރަށަށް އައިސް ރައްޔިތުން ބޭނުންވާ ކަންކަން އަޅުގަނޑުމެން މި އޮޅުންފިލުވަނީ. އިރާދަކުރެއްވިއްޔާ ކޮންމެ ރަށެއްގައި ވެސް އެ ރަށެއްގެ ތަރައްގީއަށްޓަކައި ކުރަން ޖެހޭ ކަންކަން އަޅުގަނޑުމެން ކުރަމުންދާނީ އެ ރަށެއްގެ ކައުންސިލާއި ރައްޔިތުންނާ ވާހަކަދައްކައިގެން އެމީހުން ބޭނުންވާ ގޮތަކަށް" ރައީސް ޞާލިޙް ވިދާޅުވިއެވެ.

މިހާތަނަށް އެއްވެސް ސަރުކާރުން ކުރިއަށްނުގެންދާ ވަރަށް މި ސަރުކާރުން މަޝްރޫއުތައް ކުރިއަށްގެންދާކަން ފާހަގަކުރައްވަމުން ރައީސް ޞާލިޚް ވިދާޅުވީ އިތުރު މަޝްރޫއުތައް ވެސް އެ ރަށުގައި ކުރިއަށްގެންދަވާނެ ކަމަށާއި އެގޮތުން، އެ ރަށުގެ ޖެޓީ ރަނގަޅު ކުރުމަށްފަހު ބަނދަރުގެ މަސައްކަތާއި ގިރާ ސަރަހައްދުގެ މަސައްކަތް މިއަހަރު ނިމުމުގެ ކުރިން ފެށިގެންދާނެ ކަމަށެވެ.

ހަމައެއާއެކު، އެ ރަށުގައި ދިރިއުޅޭ ޒުވާނުންނަށް ޒަމާނީ ފެންވަރުގެ ވޮލީ ކޯޓެއް އަންނަ އަހަރު އަޅުއްވައިދެއްވާނެ ކަމަށާއި މިހާރު އެ ރަށު ސްކޫލުގައި ގްރޭޑް 6 އާ ހަމައަށް ކިޔަވައިދޭއިރު ރައްޔިތުން ބޭނުންވާނަމަ ސެޓެލައިޓް ސްކޫލްގެ ޚިދުމަތް ފައްޓަވާނެ ކަމަށް ވެސް އެމަނިކުފާނު ވިދާޅުވިއެވެ.

މީގެ އިތުރުން، ކުދި ކުދި ރަށްރަށަށް ދިރުން އަންނާނީ ދަތުރުފަތުރުގެ ނިޒާމުން މުޅި އަތޮޅާއި މުޅި ރާއްޖެ ގުޅުމުން ކަމަށްވާތީ އެ މަސައްކަތްވެސް ކުރިއަށްގެންދާކަމަށް ރައީސް ޞާލިޙް ވިދާޅުވިއެވެ.