ޑިމޮކްރެޓްސްގެ ރިޔާސީ ޕްރައިމަރީގައި އިލްޔާސް ލަބީބު ވާދަކުރައްވަނީ
ޑިމޮކްރެޓްސްގެ ރިޔާސީ ޕްރައިމަރީއަށް ހުޅުވާލުމާއެކު އެ އިންތިޚާބުގައި ވާދަކުރައްވަން ޤަސްތުކުރައްވާކަމަށް ހުޅުދޫ ދާއިރާގެ މެންބަރު އިލްޔާސް ލަބީބް އިއުލާނުކޮށްފިއެވެ.
އިލްޔާސް ކުރެއްވި ޓްވީޓެއްގައި މިކަން އިއުލާނުކުރައްވަމުން ވިދާޅުވީ ރިޔާސީ އިންތިހާބުގައި ޑިމޮކްރެޓުންގެ ފަރާތުން ވާދަކުރާނެ ކެނޑިޑޭޓަކު ހޮވުމަށްޓަކައި ބާއްވާ ޕްރައިމަރީގައި ވާދަކުރަން ނިންމާފައިވާ ކަމަށާއި މެންބަރުންގެ ތާއީދަށް އެދިވަޑައިގަންނަވާކަމަށެވެ.
ދަ ޑިމޮކްރެޓްސް ޕާޓީގެ އިންތިހާބު އޮންނާނީ މިމަހު 28 ވާ ހުކުރު ދުވަހުގެ މެންދުރު 14:00 އިން 18:00އަށް ކަމަށް އެ ޕާޓީން އިއުލާނުކޮށްފައިވާއިރު، ޕްރައިމަރީގައި ވާދަކުރުމަށް ބޭނުންވާ ކެންޑިޑޭޓުން މިމަހުގެ 22 ވާ ހޮނިހިރު ދުވަހުގެ ކުރިން އެކަމަށް އެދި ހުށަހެޅުމަށް އެ ޕާޓީން ބުނެފައިވެއެވެ.
މީގެ އިތުރުން، އެ ޕާޓީން ބުނެފައިވަނީ ވޯޓު ދިނުމުގެ ހައްގު ލިބިފައިވާ މީހުންގެ ލިސްޓު މިއަދު އާއްމުކުރާނެ ކަމަށާއި އެ ލިސްޓަށް އަންނަ ހޮނިހިރު ދުވަހާ ހަމައަށް ޝަކުވާ ހުށަހެޅުމުގެ ފުރުސަތު އޮންނާނެ ކަމަށެވެ.
