މާލޭ އުތުރުފަރާތު ފަޅުގައި އަޅާފައިވާ އުޅަނދުތައް ނަގަން އަންގައިފި
މިނިވަން ދުވަސް ފާހަގަކުރުމުގެ ގޮތުން ހިންގާ ހަރަކާތްތަކާއި ގުޅިގެން މާލޭ އުތުރު ފަޅުގައި އަޅާފައި އުޅަނދުތައް ނަގަން މޯލްޑިވްސް ޕޮލިސް ސަރވިސް އިން އަންގަވައިފިއެވެ.
ފުލުހުން ވިދާޅުވީ ދިވެހިރާއްޖޭގެ 58 ވަނަ މިނިވަންދުވަސް ފާހަގަކުރުމަށް ހިންގާ ހަރަކާތްތަކާ ގުޅިގެން ޖުލައި 27 ވަނަ ދުވަހުގެ 14:00 އިން 28 ވަނަ ދުވަހުގެ 15:00 އަށް މާލެ ފަޅުތެރެ ޖެޓީ ނަންބަރު 3، 2، 1 އާންމު ދަތުރުފަތުރަށް ބަންދުވާނެ ކަމަށެވެ.
އެހެންކަމުން މިސަރަހައްދުގައި އަޅާފައިވާ އުޅަނދުތައް ޖުލައި 27 ވަނަ ދުވަހުގެ 14:00 ގެ ކުރިން ނެގުމަށް ފުލުހުން ވަނީ އަންގާފައެވެ.
ކޮންމެ އަހަރެއްގެވެސް މިނިވަން ދުވަހާއި ދިމާކޮށް ގިނަ ހަރަކާތްތަކެއް ބާއްވައެވެ. މި އަހަރުގެ ހަރަކާތްތަކުގެ ތެރޭގައި ހެވިކަމާއި ކުޅިވަރުތައް ޖުލައި 26 ވާ ބުދަދުވަހުގެ ރޭ 20:30 ގައި ގަލޮޅު ދަނޑުގައި އޮންނާނެއެވެ. އަދި ޕެރޭޑާއި ރޫޓްމާޗު 27 ޖުލައި ބުރާސްފަތި ދުވަހުގެ ހަވީރު މާލޭގެ ބޮޑެތި މަގުތަކުގައި ބާއްވަން ހަމަޖެހިފައިވާއިރު ފުޅަނދުބުރުގެ ހަރަކާތްތައް 27 ޖުލައި ވާ ބުރާސްފަތި ދުވަހުގެ ރޭ މާލޭގެ ބޮޑެތި މަގުތަކުގައި އޮންނާނެއެވެ.
މީގެ އިތުރުން މިނިވަން އުފާ ކާނިވާ 28 ޖުލައިން 4 އޯގަސްޓަށް ހުޅުމާލޭ ސެންޓްރަލް ޕާކުގައި ބާއްވާނެއެވެ. އަދި ޕެރަމޮޓޯރގެ ހަރަކާތްތައް ޖުލައި 28 އަދި 29 ވަނަ ދުވަހު ހުޅުމާލޭ ސެންޓްރަލް ޕާކުގައި އޮންނާނެއެވެ.
