ރައީސް ޔާމީން އެންމެ ބޭނުންވީ ޝަރީއަތުގެ މަރުހަލާތައް ނިމި, މިނިވަންވެގެން މަންމާފުޅާ ބައްދަލު ކުރަން
ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ
ޔާމީން އެންމެ ބޭނުންވީ ޝަރީއަތުގެ މަރުހަލާތައް ނިމި, މިނިވަންވެގެން މަންމާފުޅާ ބައްދަލު ކުރަން ކަމަށް އެމަނިކުފާނުގެ ގާނޫނީ ވަކީލު އަބްދުﷲ ޝިޔާޒް ވިދާޅުވެއްޖެއެވެ.
ޝިޔާޒު މިއަދު ކުރެއްވި ޓްވީޓެއްގައި ވިދާޅުވީ ވޭތުވެދިޔަ ދެމަހެއްހާ ދުވަހު ރައީސް ޔާމީން އެންމެ ބޭނުންފުޅުވެ ވަޑައިގެންނެވީ ޝަރީޢަތުގެ މަރުޙަލާތައް އަވަހަށް ނިމި، ޖަލު ހުކުމުން މިންޖުވެވަޑައިގެން، މަންމާފުޅުގެ އަރިހަށް ޒިޔާރަތްކޮށް ބައްދަލު ކޮށްލެވޭނެ ގޮތެއްވުން ކަަަމަށެވެ.
"އެހެންނަމަވެސް، ޝަރުޢީ ނިޒާމުގައި ހުރި ލަސްކަމުގެ ސަބަބުން މަންމާފުޅު އަވަހާރަ ވީއިރުވެސް އެ ފުރުޞަތު އެމަނިކުފާނަށް ލިބިވަޑައި ނުގެންނެވި" ޝިޔާޒު ވިދާޅުވިއެވެ.
ރައީސް ޔާމީންގެ މަންމާފުޅު ފާތިމަތު ހަސަން (ފާތުމަތު މަނިކެ) އަވަހާރަވީ އަވައްޓެރި ސްރީ ލަންކާގައެވެ. އަވަހާރަވީ އާލާސްކަންފުޅާ އުޅުއްވާތާ ދުވަސްތަކެއް ފަހުންނެވެ. ފާތުމަތު މަނިކެ ލަންކާގައި ދިރިއުޅުއްވަމުން ގެންދެވީ ޔާމީންގެ ކޮއްކޯފުޅު މުސްލިމާ އަބްދުލް ޤައްޔޫމް އަރިހުގައެވެ.
އެކަމަނާ އަވަހާރަވިއިރު އުމުރުފުޅަކީ 86 އަހަރެވެ.
ރައީސް ޔާމިންގެ މަންމާފުޅު އަވަހާރަވީއިރު އެމަނިކުފާނު ހުންނެވީ، ކޮރަޕްޝަނާއި މަނީ ލޯންޑަރިންގެ ކުށް ސާބިތުވެ، 11 އަހަރުގެ ޖަލު ހުކުމެއް ތަންފީޒު ކުރައްވަން ޖަލުގައެވެ.
Ads by STO
