އެމްޑީޕީއާ ވާދަކުރެވޭނެ ހަމައެކަނި ޕާޓީއަކީ ޕީޕީއެމް, އެހެން ޕާޓީތަކަށް ތާއީދެއް ނެތް: ރައީސް ޞާލިޙް
އަންނަ ސެޕްޓެންބަރު މަހު އޮންނަ ރިޔާސީ އިންތިޚާބުގައި ގިނަ ޕާޓީތަކަކުން ކުރިމަތިލެއްވި ނަމަވެސް, ސިޔާސީ މަޝްރަޙް ތަރުތީބުވެފައި އޮތް ގޮތުން އިންތިޚާބުގައި އެމްޑީޕީއާ ވާދަކޮށްލެވޭނެ ހަމައެކަނި ޕާޓީއަކީ ޕީޕީއެމް ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މީގެ ކުރިން ވެސް މިވާހަކަ ވަނީ ދައްކަވާފައެވެ. މި ވާހަކަތަކަށް އަނެއްކާވެސް ތަކުރާރު ކުރެއްވީ މިހާރު ރައީސް ކުރައްވަމުން ގެންދަވާ ކެންޕެއިން ދަތުރުފުޅުގައި ށ. ފުނަދުއަށް ވަޑައިގެން އެރަށުގައި ދެއްކެވި ވާހަކަފުޅުގައެވެ.
"އަޅުގަނޑުމެންގެ ވާދަވެރިންނަކީ ކޮބައިތޯ އެބަ ވިސްނާލަން ޖެހޭ. ބައެއް ޕާޓީތަކުން އެބަ ކުރިމަތިލައްވާ, ތިން ހަތަރު ބޭފުޅުންގެ ނަން އަޅުގަނޑުމެންނަށް އަޑު އެބައިވޭ. އެހެންނަމަވެސް ރާއްޖޭގެ ސިޔާސީ މަޝްރަޙް މިހާރު އޮތް ގޮތުން ހަމަ ވާދަ ކުރާނީ އެމްޑީޕީއާއި ޕީޕީއެމް. އެ ނޫން ބަޔަކަށް އެ ބުނާ ވަރުގެ ތާއީދެއް އޮތް ތަނެއް ނުފެނޭ" ރައީސް ޞާލިޙް ވިދާޅުވިއެވެ.
"ތިބޭފުޅުން ނިންމަވަންވީ 2018ގެ ކުރީގައި އޮތް ހާލަތަށް އެނބުރި ދާނީތޯ, ނުވަތަ ފެށިފައި އޮތް ތަރައްޤީގެ މަޝްރޫއުތަކާއެކު ކުރިޔަށްދާނީތޯ"
މިއަހަރު ރިޔާސީ އިންތިޚާބުގައި ވާދަ ކުރައްވާނެކަން, އެމްއެންޕީ, ޖޭޕީ އަދި ޑިމޮކްރެޓްސް އިން ވަނީ އިއުލާންކޮށްފައެވެ.
ރައީސް ޞާލިޙް އިތުރަށް ވިދާޅުވީ, ކުރީގެ ސަރުކާރުގައި ރައްޔިތުން 5 އަހަރު ތަޖުރިބާކޮށްފައިވާކަމަށާއި، އެ 5 އަހަރު ރައްޔިތުނާ ކުރިމަތިވި ދަތި އުދަނގުލާ ތަހަމަލު ކުރަންޖެހުނު ދަތި ހާލަތު އަބަދުވެސް ހަނދާނުގައި ބަހައްޓަން ވާނެކަމަށެވެ. ކުރިއަށް އޮތް ރިޔާސީ އިންތިޚާބުގައި ރައްޔިތުން ނިނަމަވާ ނިންމުން އެއީ ރާއްޖޭގެ މުސްތަޤުބަލާއި ގުޅިފައިވާ ނިންމުމެއްކަން ވިސްނުމަށް ރައީސް ޞާލިޙް ވަނީ އެދިވަޑައިގެންފައެވެ.
"ތަރައްޤީއާއެކު ކުރިޔަށްދާނީތޯ, ނޫނީ އަނިޔާވެރިކަމުގެ ތެރެއަށް އެނބުރިދާނީތޯ" ރައީސް ޞާލިޙް ވިދާޅުވިއެވެ.
Ads by STO
