އަވަހަށް ވޯޓުލައި ނިންމަން ރައީީސްގެ އިލްތިމާސްއެއް
ވޯޓުލާ ދުވަހު ހުރިހައި ރައްޔިތުން ވެސް އެންމެ ބޮޑު ސަމާލުކަމެއް ދޭންވީ، އަވަހަށް ނުކުމެ ވޯޓު ލުމަށް ކަމަށް މޯލްޑިވިއަން ޑިމޮކްރެޓިކް ޕާޓީ(އެމްޑީޕީ)ގެ ރިޔާސީ ކެންޑިޑޭޓް، ރައީސް އިބްރާހީމް މުޙައްމަދު ޞާލިޙު އިލްތިމާސް ކުރައްވައިފިއެވެ.
ރައީސް މިކަމަށް އިލްތިމާސް ކުރެއްވީ ހއ.ބާރަށަަށް މިއަދު ވަޑައިގެން ދެއްކެވި ވާހަކަފުޅުގައެވެ.
ރައީސް ވިދާޅުވީ، ރާއްޖޭގެ ސިޔާސީ މަސްރަހް މިވަގުތު އޮތް ގޮތުން، ވޯޓު ލުމަށް އެހައި ބޮޑު އަހައްމިއްޔަތުކަމެއް ނުދީ ބައެއް ރަށް ރަށުގައި މީހުން ތިބޭ ތަން ފެންނަ ކަމަށެވެ.
އެމަނިކުފާނު ވިދާޅުވީ ރައްޔިތުން ވޯޓު ލުމަށް ފަރުވާ ކުޑަކޮށްލާ އެއް ސަބަބަކީ ވާދަވެރިން ނެތުން ކަމަށެވެ.
ވާދަވެރިން ތިބި ކަމުގައިވިޔަސް އެ ބޭފުޅުންގެ ފަރާތުން މި އިންތިޚާބާ ދޭތެރޭގައި މާބޮޑަށް ސިޔާސީ ހަރަކާތްތަކެއް ނުފެންނަ ކަމަށް ވިދާޅުވިއެވެ.
ަރައީީސް އިތުރަށް ވިދާޅުވީ، އެމަނިކުފާނުގެ ސަޕޯޓަރުން ނުކުމެ ވޯޓު ނުލައިފިނަމަ، އަނިޔާވެރިކަމާއި ބިރުވެރިކަމުގެ ދަށަށް ހުރިހާ ކަމެއް ދިއުމުގެ ފުރުސަތު އެބަ އޮތް ކަމަށެވެ.
"އަޅުގަނޑުމެން ފަރުވާތެރިކަމާ އެކީގައި މިކަން ކުރަން އެބަޖެހޭ. މިއީ މުޅި ރާއްޖޭގެ މުސްތަގުބަލާއި ދޭތެރޭގައި އަޅުގަނޑުމެން ނިންމަން ޖެހޭ ނިންމުމެއް،" އެމަނިކުފާނު ވިދާޅުވިއެވެ.
މީގެ އިތުރުން، ރައީސް ޞާލިޙު ވަނީ، ބާރަށު ރައްޔިތުން މިއަދު ތިބީ ސަރުކާރުން ގެންނަ ތަރައްގީ އާއި އެކީގައި ކުރިއަށް ދާން ތައްޔާރަށް ކަމަށް ވެސް ވިދާޅުވެފައެވެ.
Ads by STO
