ރިޔާސީ އިންތިހާބު 2023: ކެންޑިޑޭޓުންގެ ނަން ތަރުތީބުކުރުން މާދަމާ
އަންނަ މަހުގެ 9 ވަނަދުވަހު ބާއްވާ ރިޔާސީ އިންތިޚާބުގައި ވާދަކުރާ ކެންޑިޑޭޓުންގެ ނަން ތަރުތީބުކުރުން މާދަމާ ހަވީރު ބޭއްވުމަށް އިލެކްޝަނަސް ކޮމިޝަނުން ނިންމަވައިފިއެވެ.
އިންތިޚާބަށް ޝަރުތު ހަމަވާ ކެންޑިޑޭޓުންގެ ނަން ތަރުތީބުކުރުމަށް ގުރުއަތުން ނެގުން އޮންނާނީ މާދަމާ 16:30ގައި ދަރުބާރުގޭ ރަންނަ ބަންޑޭރި މާލަމުގައިކަމަށެވެ.
އިލެކްޝަން ކޮމިޝަނުން ވިދާޅުވީ ކެންޑިޑޭޓަށް ހާޟިރުވެވެން ނެތްނަމަ، ކެންޑިޑޭޓުގެ ބަދަލުގައި އެހެން މީހަކު ފޮނުވާނަމަ އެކަން ސިޓީއަކުން ހުށައަޅަންޖެހޭނެކަމަށެވެ. ކެންޑިޑޭޓް ނުވަތަ ބަދަލުގައި މީހަކު ހާޟިރު ނުވެއްޖެނަމަ އެ ކެންޑިޑޭޓުގެ ބަދަލުގައި ގުރުއަތު ނަގާނީ އިލެކްޝަންސް ކޮމިޝަނުންނެވެ.
މިފަހަރުގެ ރިޔާސީ އިންތިޚާބަށް 8 ކެންޑިޑޭޓަކުން މިވަނީ ނަން ހުށައަޅާފައެވެ. އޭގެ ތެރޭގައި ހިމެނެނީ މިނިވަންކޮށް ވާދަކުރި 3 ކެންޑިޑޭޓުންނާއި އެކި ސިޔާސީ ޕާޓީތަކުން ވާދަކުރި 5 ކެންޑިޑޭޓުންނެވެ.
ސިޔާސީ ޕާޓީތަކުން ކުރިމަތިލެއްވި ކެންޑިޑޭޓުންނަކީ ރައީސް އިބްރާހިމް މުހައްމަދު ޞާލިހު / އެމްޑީޕީ, ޑރ.މުހައްމަދު މުއިއްޒު / ޕީއެންސީ, ޤާސިމް އިބްރާހިމް / ޖުމްހޫރީ ޕާޓީ, މުހައްމަދު ނާޒިމް / އެމްއެންޕީ, އަދި އިލްޔާސް ލަބީބް / ޑިމޮކްރެޓްސް އެވެ. އަމިއްލަ ގޮތުން އަހުމަދު ފާރިސް މައުމޫން, އުމަރު ނަސީރު އަދި ހަސަން ޒަމީލް ވަނީ އިންތިހާބަށް ކުރިމަތިލައްވާފައެވެ.
Ads by STO
