ފްލެޓް ލިބިއްޖެ ކަމަށް ބުނެ ހިންގާ ސްކޭމްތަކަށް ސަމާލުވުމަށް އިލްތިމާސްކޮށްފި
އެކި ސްކީމްތަކުން ފްލެޓް ލިބިފައިވާ ކަމަށް ބުނެ، މީހުންނަށް ގުޅައި އެ މީހުންގެ ނަންބަރުތަކުގައި އީ-ސިމް ހަދާ ސްކޭމެއް އާންމުވަމުން ދާތީ ސަމާލުވާން އަންގައިފިއެވެ.
ފުލުހުން ވިދާޅުވީ އެކި ދުވަސްވަރާ ދިމާކޮށް ފްލެޓް ލިބިފައިވާކަމަށް ބުނެ ފޯނަށް ގުޅައިގެންނާއި މެސެޖް ނުވަތަ އީމެއިލް ކޮށްގެން މަކަރާއި ހީލަތުން އެކި މީހުންގެ އަތުން ފައިސާ ހޯދަމުންދާ މައްސަލަތަކަކީ ފުލުހުންނަށް ހުށަހެޅެމުންދާ މައްސަލަތަކުގައި ހިމެނޭ ބާވަތެއް ކަމަށެވެ.
އަދި ސަރުކާރުން މިހާރު އިއުލާނުކޮށްފައިވާ “ގެދޮރުވެރިޔާގެ ހައުސިންގ ސްކީމް” ގެ ދަށުން ފްލެޓް ލިބިފައިވާ ލިސްޓާ ގުޅިގެން ހީލަތްތެރިންގެ މަކަރާއި އޮޅުވާލުން އިތުރުވުމަކީ އެކަށީގެންވާކަމެއް ކަމަށް ވިދާޅުވިއެވެ.
އެހެން ކަމުން އެފަދަ ފަރާތްތަކުގެ ކިބައިން ސަލާމަތްވުމަށްޓަކައި ސައްހަ މައުލޫމާތު ހޯދައި، އެމީހުން ބޭނުންކުރާ އުކުޅުތަކާ ގުޅޭ މައުލޫމާތު އެއްކޮށް، މަކަރާއި ހީލަތުން ފައިސާ ހޯދުމަށް ހިންގާ ސްކޭމްތައް ދެނެގަތުމަކީ ރައްކާތެރިކަމުގެ ގޮތުން އެޅޭނެ އެންމެ މުހިންމު ފިިޔަވަޅު ކަމަށް ފުލުހުން ވިދާޅުވިއެވެ.
Ads by STO
