ރައްޔިތުން ބޭނުންވާ ތަރައްޤީ ރާއްޖެއަށް ގެނެވޭނީ ބޭކާރު ސިޔާސީ ހަލަބޮލިކަން ނެތިގެން: ރައީސް ޞާލިޙް

ރައްޔިތުން ބޭނުންވާ ތަރައްޤީ ރާއްޖެއަށް ގެނެވޭނީ ބޭކާރު ސިޔާސީ ހަލަބޮލިކަން ނެތިގެންކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

Ads by STELCO

ރައީސް ޞާލިޙް މިހެން ވިދާޅުވީ އެމަނިކުފާނުގެ ކެމްޕޭނަށް ހުވަދު އަތޮޅަށް ކުރައްވަމުންގެންދަވާ ދަތުރުފުޅުގައި ގއ. ނިލަންދޫއަށް ވަޑައިގެން ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ.

އެގޮތުން، މި ސަރުކާރުގައި ދިވެހިރާއްޖޭގައި ކުރިން އޮތް ހަމަނުޖެހުމާއި ހަލަބޮލިކަން ހުއްޓުމަކަށް ގެނެވިއްޖެކަމަށާއި ރާއްޖޭގެ ތަރައްގީއަށްޓަކައި ކުރަންޖެހޭ ބައިވަރު މަސައްކަތެއް ހުރިކަމަށެވެ. އަދި ވެރިކަމުގައި ތިބޭ ބަޔަކަށް އެ މަސައްކަތްތަކާއެކު ކުރިއަށް ދެވޭނީ ބޭކާރު ސިޔާސީ ހަލަބޮލިކަން ނެތިގެންކަމަށްވެސް ރައީސް ޞާލިޙް ވިދާޅުވިއެވެ.

މިއަދު ރާއްޖެ ފައްކާވަމުން މިދަނީ ޒަމާނީ ޑިމޮކްރަސީއެއްގައިކަމަށާއި އޭގެ އެންމެ މުހިންމު ބަޔަކީ ހިޔާލު ފާޅުކުރުމާއި އެއްވެ އުޅުމާއި ނޫސްވެރިކަމުގެ މިނިވަންކަން ފުރިހަމަ ވެފައި އޮތުންކަން ފާހަގަކުރައްވަމުން ރައީސް ޞާލިޙް ވިދާޅުވީ، ސިޔާސީ ހިޔާލުތަފާތުވުންތަކަށް ޖާގަދީ ރައްޔިތުންނަށް ކޯށްދެންޖެހޭ މަސައްކަތްތައް ކުރަމުން ގެންދަވާކަމަށް އެމަނިކުފާނު ވިދާޅުވިއެވެ.

ދެވަނަ ދައުރަކަށް ކުރިމަތިލާއިރު ވިސްނަންޖެހޭ ކަންތައް އެބަހުރި ކަމަށާއި ކުރިއަށް އޮތް ދައުރުގައި މި ސަރުކާރުން ފަށާފައިވާ މުހިންމު މަސައްކަތްތައް ކުރިއަށް ގެންދެވޭނެ ގޮތަކަށް ވިސްނުން ބެހެއްޓުމަކީ ވަރަށް މުހިންމު ކަމެއްކަމަށް ފާހަގަކުރައްވަމުން ރައީސް ޞާލިޙް ވިދާޅުވީ އެހެެންނޫނަންމަ ދެން އަންނަ ސަރުކާރަކުން ބޭކާރު އެތައް ހަރަދެއް ދައުލަތުގެ ބަޖެޓުން ކުރަންޖެހޭނެކަމަށެވެ.

މީގެ އިތުރުން، ޑިމޮކްރަސީއެއްގައި ސިޔާސަތުތައް ބަދަލުވުމަށް ފުރުސަތުދޭކަމަށް ވަންޏާ ރައްޔިތުން ބޭނުންވާ ތަރައްގީއެއް ނުލިބޭނެކަމަށާއި ސިޔާސީ ހަލަބޮލިކަމުގެ ތެރޭގައި ކޮންމެ ފަސް އަހަރަކުން ސަރުކާރު ބަދަލުވަމުންދާކަމުގައި ވަންޏާ އެކަންތައްތައް ހުއްޓިގެންދާނެކަމަށް އެމަނިކުފާނު ވިދާޅުވިއެވެ.

އަދި އެއީ ތަޖުރިބާކޮށްފައިވާކަމެއް ކަމަށާއި، 2008 ވަނަ އަހަރު އެމްޑިޕީ ވެރިކަމަށް އައިސް ފެށި ވަރަށް ރަނގަޅު ގިނަ މަސައްކަތްތަކެއް އެފަހުން އައި ސަރުކާރުގެ ސަބަބުން ހުއްޓުމަކަށް އައިސްފައިވާކަމަށާއި ރަށްރަށާ ދޭތެރޭގައި އަޅާލަންޖެހޭ ވަރަށް އަޅާނުލައި ދޫކޮށްލާފައިވާކަމަށް ރައީސް ޞާލިޙް ފާހަގަކުރެއްވިއެވެ.