އެތައްހާސް ދަރިވަރުންގެ ލޯނު މަޢާފުކޮށްދެއްވުމުން، ޤާސިމަށް ތަޢުރީފު އޮހެނީ
ވެރިކަން ލިބިވަޑައިގަތަސް، އަދި ނޫނަސް ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހީމް ދެއްވި ލޯނުގައި ކިޔަވަމުން ގެންދާ އަދި ކިޔަވާ ނިމި ލޯނު ދައްކާ ނިމިފައިނުވާ ހުރިހައި ކުދިންގެ ލޯނު މަޢާފުކޮށްދޭނެ ކަމަށް ވިދާޅުވެއްޖެއެވެ.
ޖޭޕީގެ ކެންޑިޑޭޓް އެ ވިދާޅުވީ ގާތްގަނޑަކަށް 8000އެއްހައި ދަރިވަރުންގެ ލޯނުގެ ވާހަކައެވެ. އެއާއެކު ޤާސިމަށް ތައުރީފު ކުރާ ފަރާާތްތަކުން ބުނަނީ، އޭނާ އެ ކޮށްދެއްވީ ވަރަށް ބޮޑު ހެޔޮ ކަމެއް ކަމަށާއި، އެކަމުން އަންގައިދެނީ ޒުވާނުންގެ ތަޢުލީމަށް ޤާސިމް އިސްކަން ދެއްވާ މިންވަރު ކަމަށެވެ.
"ޤާސިމްގެ އިޙްލާސްތެރިކަން އެބަ އެނގޭ، ވެރިކަން ލިބިވަޑައިނުގަތަސް އެކަން ކޮށްދެއްވާތީ. ޤައުމަށް ބޭނުންވަނީ ތިޔަ ފަދަ ލީޑަރުން." މީސްމީޑިއާގައި މީހަކު ބުންޏެވެ
ޣިޔާސުއްދީން ސްކޫލްގައި 10 އަހަރު ޕްރިންސިޕަލްއެއްގެ ގޮތުގައި މަސައްކަތް ކުރެއްވި ޠާޙާ ސަލީމް ވިދާޅުވީ ޤާސިމްއަށް އެތައް ބައެއްގެ ލޯބި ލިބިފައިވާ ކަމަށާއި، ޤާސިމް އެއްވެސް ލޯނެއް، ސްކޮލަރޝިޕެއް އަދި ބޭސްފަރުވާގެ އެހީއެއް ދެއްވާއިރު، ސިޔާސީ ޝަރުތެއް ނުކުރައްވާ ކަމަށެވެ.
"ލޯނު ނަގައިފައިވާ ގިނަ ފަރާާތްތަކުގެ ލޯނު އެކި ފަހަރުމަތިން ވަނީ މަޢާފު ކޮށްދެއްވައިފައި. ސިޔާސީ ލެންސް އެއްފަރާތްކޮށް، އިޖްތިމާއީ އައިނަކުން ބަލާ މީހަކަށް މި ވާހަކަ ޤަބޫލުކުރެވޭނެ."
އޭނާ ވަނީ ޤާސިމްގެ މުދަލުގައި ބަރަކާތް ލެއްވުން އެދި ދުޢާ ދަންނަވައިފައެވެ.
ޕްރޮފެސަރ ޙަސަން އުގައިލް ވެސް ވަނީ ފޭސްބުކްގައި ކުރެއްވި ޕޯސްޓެއްގައި ޤާސިމްގެ ހިތްހެޔޮކަމަށް ތަޢުރީފު ކުރައްވައިފައެވެ.
މި އަހަރުގެ ރިޔާސީ އިންތިޚާބުގައި ޤާސިމް ވާދަކުރައްވާއިރު، ރޭ ލޯންޗު ކުރި އޭނާގެ މެނިފެސްޓޯގައި ޒުވާނުންނަށް ވެސް ގިނަ ވަޢުދުތަކެއް ހިމެނެއެވެ. ޤާސިމް ވަނީ 100 މިލިއަނަރުން އުފައްދަވަން ވެސް ވަޢުދުވެވަޑައިގެންފައެވެ. އޭނާގެ ކެމްޕެއިން ޝިޢާރަކީ "ހާސް ކަނޑާލާ، ހަމަޖެހޭނެ."އެވެ.
Ads by STO
