ރައީސް ޔާމީން ގެއަށް ބަދަލުކުރި ވާހަކަ އަކީ ދޮގެއް: ކަރެކްޝަންސް
11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް ޔާމީން އަބްދުލްގައްޔޫމް ގެއަށް ބަދަލުކުރުމަށް ސަރުކާރުން ނިންމާފައިވާ ކަމަށް ބުނެ ދެކެވޭ ވާހަކައަކީ ހަގީގަތާ ހިލާފު ވާހަކައެއް ކަމަށް ކަރެކްޝަނުން ވިދާޅުވެއްޖެއެވެ.
ބައެއް ނޫސްތަކުން ރިޕޯޓްކޮށްފައިވާ ގޮތުގަައި ރައީސް ޔާމީން ގެއަށް ބަދަލުކުރެއްވުމަށް ނިންމެވީ ރައީސް އިބްރާހިމް މުހައްމަދު ޞާލިޙްގެ އެންގެވުމަށް ހޯމް މިނިސްޓްރީންނެވެ.
އަދި ހޯމް މިނިސްޓްރީގެ އެންގެވުމާއި އެއްގޮތަށް މިއަދު ނޫނީ މާދަމާގެ ވަގުތެއްގައި ރައީސް ޔާމީން ގެއަށް ބަދަލުކުރައްވާނެކަމަށް ރިޕޯޓްކޮށްފައިވެއެވެ.
ނަމަވެސް ކޮމިޝަނަރ އޮޕް ޕްރިސަންސް އަހްމަދު މުހައްމަދު ފުޅުު ވިދާޅުވީ ރައީސް ޔާމީން ގެޔަށް ބަދަލުކުރަން ނިންމާފައި ނުވާ ކަމަށެވެ.
“ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް ގެޔަށް ބަދަލުކުރިކަމަށް ބައެއް މީޑިއާތަކުން ބުނަމުންދާތީ، އެއީ ސައްހަ މަޢުލޫމާތެއް ނޫންކަމުގައި ދަންނަވަން” މުހައްމަދު ފުޅު ވިދާޅުވިއެވެ.
ވ. އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގައި ޔާމީން 11 އަހަރަށް ޖަލަށް ލުމުގެ އިތުރުން، ފަސް މިލިއަން ޑޮލަރުން ކުރި ޖޫރިމަނާ ހުކުމް ދެމިއޮތުމުގެ ސަބަބުން، ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ޔާމީނަށް ވާދަ ކުރެއްވުމުގެ ފުރުސަތު ވަނީ ގެެއްލިފައެވެ.
