ރައީސް ޞާލިޙް މުޢިއްޒު އަށް: މެނިފެސްޓޯގައި "ތާކުންތާކު ޖެހޭ އެއްވެސް އެއްޗެއް ނެތް”

ރިޔާސީ އިންތިހާބަށް ޕީއެންސީގެ ފަރާތުން ވާދަކުރައްވާ ކެންޑިޑޭޓް ޑރ. މުހައްމަދު މުއިއްޒުގެ މެނިފެސްޓޯގައި "ތާކުންތާކު ޖެހޭ އެއްވެސް އެއްޗެއް ނެތް" ކަމަށް ރައީސް އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

Ads by Hajj Corporation

ރިޔާސީ އިންތިހާބުގެ ކެމްޕޭނުގައި ބ. ފެހެންދުއަށް ވަޑައިގެން ރައީސް ވިދާޅުވީ, ޕީއެންސީގައި ސިޔާސަތުތަކެއް އޮވެގެން ކުރިމަތިލައިގެން އުޅޭ ބޭފުޅުން ތިބިހެން ހީނުވާ ކަމަށެވެ. އަދި އެ ބޭފުޅުންގެ އެއްވެސް ވިޝަންއެއް ވެސް ނެތް ކަމަށް ރައީސް ޞާލިޙް ވިދާޅުވިއެވެ.

ރައީސް ވިދާޅުވީ މެނިފެސްޓޯއަކީ ބައެއް އަކުރުތަކާއި ފިލިތައް ބަދަލުކޮށްގެން އެކުލަވާލާފައިވާ މެނިފެސްޓޯއެއް ކަމަށާއި ހައުސިން  ބޭންކުގެ ވާހަކަ މުއިއްޒު ދެއްކެވި ނަމަވެސް އެއީ އެމްޑީޕީން އިއުލާންކޮށް ނިންމާފައިވާ ކަމެއް ކަމަށެވެ.

“އޭގަ ހުރި ބައެއް އަކުރު ބަދަލުކޮށްލާފަ, ފިލި ބަދަލުކޮށްލާފަ އެބަ ވިދާޅުވޭ. އެކަމަކު ވެސް އެ ދައްކަވަނީ އަޅުގަނޑުމެން އިއުލާނުކޮށް ނިންމާފައި ހުރި ކަންތައްތަކުގެ ވާހަކަ" ރައީސް ވިދާޅުވިއެވެ.

19 ބާބުގެ މައްޗަށް އެކުލެވިގެންވާ މުއިއްޒުގެ މެނިފެސްޓޯގައި އެންމެ ބޮޑު އިސްކަމެއް ދީފައި ވަނީ، މުއިއްޒު ވިދާޅުވި ގޮތުގައި، ދިވެހީންނަށް ދިމާވެފައިވާ އެންމެ ބޮޑު މައްސަލަ ކަމުގައިވާ، ގެދޮރުވެރިކަމުގެ މައްސަލަ ހައްލު ކުރުމަށެވެ.