އިިސްލާހީ މަސައްކަތަށް ނުކުތީ، ބޮޑު މަޤާމެއް ބޭނުން ވެގެނެއް ނޫން: ޤާސިމް
އޭނާ އަބަދުވެސް މަސައްކަތް ކުރައްވައިފައިވާނީ އިސްލާހަށް ކަމަށާއި، އެއީ އެއްވެސް ބޮޑު މަޤާމެއް ބޭނުންފުޅުވެގެން ނޫން ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް، ޤާސިމް އިބްރާހީމް ވިދާޅުވެއްޖެއެވެ.
ޤާސިމް މިފަދައިން ވިދާޅުވީ، މިއަދު އ.އ ފެރިދޫއަށް ވަޑައިގެން ސަޕޯޓަރުންނާއި ބައްދަލުކުރައްވައި ދެއްކެވި ވާހަކައިގައެވެ. ޤާސިމް ވިދާޅުވީ އޭނާ އިސްލާހީ މަސައްކަތުގައި އުޅުއްވާތާ އެތައް އަހަރެއް ވެގެންދިޔައިރުވެސް، އެކަމުގެ ސަބަބުން ނިކަމެތިކަން ފިޔަވައި އެހެން އެއްޗެއް ލިބިވަޑައިނުގަންނަވާ ކަމަށެވެ.
"އަޅުގަނޑަށް ވެވެން އޮތް ގޮތަކުން، ޤާނޫނު ހުއްދަ ކުރާ ހުރިހައި ގޮތަކުން މަސައްކަތް ކުރަމުން އައީ، އައިސް މިއަދު، ބޮޑު ސިންގާ އަލިފާން އަނގުރުގަނޑެއްގެ ތެރެއަށް އަޅުގަނޑުމެންދާތަން ފެނުނީމަ، ބަލަން ނުހުރެވިގެން މި ނުކުތީ އަޅުގަނޑު."ޤާސިމް ވިދާޅުވިއެވެ.
ޤާސިމް އިތުރަށް ވިދާޅުވީ، ލިބިވަޑައިގެންފައިވާ ތަނަވަސްކަމުގައި އޭނާ އާއި، ރައީސް ޑރ.މުޙައްމަދު ވަހީދު ހަސަން މަނިކަށް ވެސް އުޅުއްވުނީސް ކަމަށާއި، ނަމަވެސް ޤައުމަށް ވަމުންދާ ގޮތުން، ސިޔާސީ މަސައްކަތުގައި އުޅުއްވަން މަޖުބޫރުވީ ކަމަށެވެ.
"އެހެން ނޫން ކަމަށް ވަންޏާ، އަޅުގަނޑު އަޅާނުލާ ހުރެ، އަމިއްލަ އެދުމުން ފޯވެގެން، ވެރިކަމުގައި ތިބި ބަޔަކަށް ވައި ޖަހައިގެން، އެގޮތުގައި އަޅުގަނޑު ހުރީމަ، ކިހިނެއްތޯ އެ ވަނީ؟" ޤާސިމް އެއްސެވިއެވެ.
މަޖިލީހުގެ މާމިގިލި ދާއިރާގެ މެމްބަރު އިތުރަށް ވިދާޅުވީ، ޤައުމަށް ވަމުންދާ ގޮތް ރައްޔިތުންނަށް ބުނެދިނުމަކީ ކުރަން ޖެހޭނެ ކަމެއް ކަމުގައި ޤަބޫލު ކުރައްވާ ކަމަށާއި، މިހާރު އަދާ ކުރައްވަމުންދަނީ އެ ވާޖިބު ކަމަށް ވެސް ވިދާޅުވިއެވެ.
އެންމެކުޑަމަޤާމު ބޭނުންވާ މީހުން ރިޔާސީ އިންތިޚާބުގަ ވާދަކުރާނީ!ރައީސްކަމަށްކުރިމަތިލައިގެން އުޅެންވާނީ އެކަމަށްކުފޫހަމަވާމީހުން.