55 އަހަރުވުމުން ރިޓަޔާ ކުރާ މީހުންނަށް އެލަވެންސެއް ދޭނަން: މުޢިއްޒު
އުމުރުން 55 އަހަރުވުމުން ރިޓަޔާ ކުރާ ނަމަ، ހާއްސަ އެލަވަންސެއް ދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕެއިނަށް ތިނަދޫއަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުން މުޢިއްޒު ވިދާޅުވި 55 އަހަރާއި 65 އަހަރު ދެމެދުގައި އަމިއްލަ އަށް ރިޓަޔާކުރާ މީހުންނަށް ހާއްސަ އެލަވެންސެއް ދޭން ޖެހޭ ކަމަށެވެ.
އަދި ޕީޕީއެމް/ޕީއެންސީން އޯގާތެރި ވެރިކަމެއްގައި 55 އަހަރާއި 65 އަހަރާ ދޭތެރޭގެ މީހުން ރިޓަޔާ ކުރުމުން އެލަވަންސެއް ދެއްވާނެ ކަމަށް މުއިއްޒު ވިދާޅުވިއެވެ.
"55 އަހަރާއި 65 އަހަރާއި ދެމެދުގެ ޢުމުރުފުރައިގައި ތިބި މީހުންގެ ތެރެއިން 55 އަހަރުގައި ރިޓަޔަރ ކުރަން ބޭނުންވާ ފަރާތްތަކަށް 65 އަހަރާއި ހަމައަށް ދަންދެކަށް އިރާދަކުރެއްވިއްޔާ އަޅުގަނޑުމެން ނިޒާމުގެ ތެރެއިން އެލަވަންސެއް ކަނޑައަޅައި ތަޢާރަފްކޮށް އެލަވަންސެއް ދޭނަން" މުޢިއްޒު ވިދާޅުވިއެވެ.
މުއިއްޒުގެ ވާހަކަފުޅުގައި އެމަނިކުފާނު ވަނީ އިދިކޮޅު ލީޑަރު އަދި ރައީސް ޔާމީންގެ ސަރުކާރުގައި ތިނަދޫ އަށް ގެނެސްފައިވާ ތަރައްގީއާ ގުޅޭ ގޮތުން ވާހަކަދައްކަވާފައެވެ. އެމަނިކުފާނު ވިދާޅުވި ގޮތުގައި ރައީސް ޔާމީންގެ ވެރިކަމުގައި ހަމައެކަނި ތިނަދޫ އަށް އެއް ބިލިއަން ރުފިޔާ ހަރަދު ކޮށްފައިވާ ކަމަށެވެ.
