ކޯރަމް ހަމަނުވާތީ މިއަދުގެ މަޖިލިސް ޖަލްސާ ނުބޭއްވުނު
ރައްޔިތުންގެ މަޖިލީހުގެ މިއަދުގެ ޖަލްސާއަށް ކޯރަމް ހަމަނުވުމުގެ ސަބަބުން ޖަލްސާ ނިންމާލައިފިއެވެ.
މިއަދުގެ ޖަލްސާގައި ރިޔާސަތުގައި އިންނެވީ މަޖިލީހުގެ ރައީސް މުހައްމަދު ނަޝީދުއެވެ. ޖަލްސާ ފެށުމާއެކު ރައީސް ނަޝީދު ވިދާޅުވީ މަޖިލީހުގެ ގަވާއިދު ބުނާ ގޮތުން ޖަލްސާ ފަށާއިރު 22 މެންބަރުން ތަޅުމަށް ހާޒިރުވެ ތިބެންޖެހޭކަމަށެވެ.
އެހެންނަމަވެސް މިއަދުގެ މަޖިލީހުގައި އެ އަދަދު ހަމަ ނުވުމުގެ ސަބަބުން މަޖިލިސް ވަނީ ފެށުމާ އެކު ނިންމާލައިފައެވެ.
"މަޖިލީހުގެ ޖަލްސާ ކުރިޔަށް ގެންދެވެނީ ޖަލްސާ ފަށާއިރު 22 މެމްބަރުން ހާޒިރުވެގެން. ކޯރަމް ރަނގަބީލު ޖަހާ އޭގެ ވަގުތު ހަމަވޭ. އެހެންނަމަވެސް މަޖިލީހުގެ ތަޅުމަށް ކޯރަމް ހަމަވާ މިންވަރަށް މެމްބަރުން ހާޒިރު ނުވާތީ ޖަލްސާ ނުބޭއްވި ނިމުނީ" ރައީސް ނަޝީދު ވިދާޅުވިއެވެ.
ކުރިއަށް އޮތް ރިޔާސީ އިންތިޚާބާ ދިމާކޮށް ގިނަ މެންބަރުންތަކެއް އަންނަނީ ކެމްޕެއިން ދަތުރުތަކުގައި އަތޮޅުތެރެއަށް ދަތުރުކުރަމުންނެވެ.
