ކޯރަމް ހަމަނުވާތީ މިއަދުގެ ޖަލްސާ ވެސް ނިންމާލައިފި
ރައްޔިތުންގެ މަޖިލީހުގެ މިއަދުގެ ޖަލްސާއަށް ކޯރަމް ހަމަނުވުމުގެ ސަބަބުން ނިންމާލައިފިއެވެ.
މިއަދުގެ ޖަލްސާގައި ރިޔާސަތުގައި އިންނެވީ ވިލުފުށީ ދާއިރާގެ މެންބަރު ހަސަން އަފީފްއެވެ. މިއަދުގެ ޖަލްސާއަށް ހާޒިރުވެފައި ވަނީ، އެންމެ ނުވަ މެންބަރުންނެވެ.
ޖަލްސާ ފެއްޓެވުމަށް ފަހު އަފީފް ވިދާޅުވީ މިއަދުގެ ޖަލްސާ ކުރިޔަށް ގެންދެވެން ނެތް ކަމަށެވެ. އެއީ ކޯރަމް ހަމަނުވާތީ ކަމަށާއި މިއަދުވެސް ޖަލްސާ ނިންމާލަން ޖެހިފައިވާ ކަމަށާއި ޖަލްސާ ފެއްޓޭނީ 22 މެމްބަރުން ހަމަވެގެން ކަމަށެވެ.
"ވަރަށް ދެރަ ކަމެއް ކޮންމެ ދުވަހަކު މިހެން ވާން ވެއްޖިއްޔާ. މަޖިލީހުގެ މަސައްކަތާއިގެން ކުރިޔަށް ދިޔުމަށް އަޅުގަނޑުމެން ޖެހޭނެ އިސްކަން ދޭން. އެހެން ނަމަވެސް މިއަދުވެސް ކޯރަމް ހަމަނުވާތީ އަޅުގަނޑުމެން މިޖެހެނީ ޖަލްސާ ނިންމާލަން" އަފީފް ވިދާޅުވިއެވެ.
ކުރިއަށް އޮތް ރިޔާސީ އިންތިޚާބާ ދިމާކޮށް ގިނަ މެންބަރުންތަކެއް އަންނަނީ ކެމްޕެއިން ދަތުރުތަކުގައި އަތޮޅުތެރެއަށް ދަތުރުކުރަމުންނެވެ.
