ޕާކިން ޖޫރިމަނާ މަޢާފު ކުރުމުން، ޖަމީލުގެ ޝުކުރު މުޢިއްޒުއަށް
ހުރިހައި ޕާކިން ޖޫރިމަނާއެއް ސަރުކާރުން މަޢާފު ކުރުމުން، ކުރީގެ ނައިބު ރައީީސް ޑރ.މުޙައްމަދު ޖަމީލު އަޙުމަދު، ޕީއެންސީގެ ރިޔާސީ ކެންޑިޑޭޓް، ޑރ.މުޙައްމަދު މުޢިއްޒުއަށް މިރޭ ޝުކުރު އަދާ ކުރައްވައިފިއެވެ.
މިއަދު ސަރުކާރުން އާއްމު ކުރި ލިޔުމެއްގައި ވިދާޅުވީ, ޕާކިން ޖޫރިމަނާ މާފު ކުރަން ނިންމާފައިވަނީ މާލެ ސިޓީގައި އެކަށީގެންވާ ވަރަށް ޕާކު ކުރާނެ ޖާގަ ނެތި ސްޓިކާ ޖަހަމުން ދިއުމުގެ ސަބަބުން ޖޫރިމަނާތައް އިތުރުވަމުންދާ ކަމުގެ ޝަކުވާ ރައްޔިތުންގެ ފަރާތުން ތަކުރާރުކޮށް ލިބެމުންދިޔުމާއި، ޓްރެފިކް ޤަވާއިދާ ޚިލާފުވެގެން ޖޫރިމަނާ ކުރާ މިންވަރު އަހަރަކަށްވުރެ އަހަރެއް އިތުރުވަމުން ދާތީ ކަމަށެވެ.
އަދި، ކޮވިޑް 19 އާ ގުޅިގެން މާލީ ގޮތުން ޢާންމުންގެ ދިރިއުޅުމަށް އައި ބޮޑެތި ބަދަލުތަކާއެކު، މިފަދަ ޖޫރިމަނާ ފައިސާ ނުދެއްކި އިތުރުވަމުންދިއުމާއި، މިކަން މިގޮތަށް ހިނގަމުންދާކަން ރައީސުލްޖުމްހޫރިއްޔާއަށާއި ސަރުކާރަށް ވެސް ޤަބޫލުފުޅުކުރެއްވޭތީ، ރައްޔިތުންނަށް ލުއި ގޮތެއް ހޯއްދަވައިދިނުމަށް ޖޫރިމަނާ މާފު ކުރަން ނިންމެވީ ކަަމަށް ބުނެފައިވެއެވެ.
މިކަމާ ގުޅިގެން މުއިއްޒުއަށް ޝުކުރު އަދާ ކުރައްވައި، ޖަމީލު ވިދާޅުވީ، މުއިއްޒުގެ ފަރާތްޕުޅުން މިހާރުވެސް ޚާއްޞަކޮށް ދިވެހި އެތަކެއް ޒުވާނުންނަށް މިވީ ފައިދާ ކަމަށެވެ.
ވެރިކަން ލިބިވަޑައިގެންފިނަމަ، މި ސަރުކާރުން ކޮށްފައިވާ ޕާކިން ޖޫރިމަނާތައް މަޢާފު ކޮށްދެއްވާނެ ކަމަށް މުއިއްޒު ވަނީ ވައުދުވެވަޑައިގެންފައެވެ.
"5 އަހަރުގެ ދައުރު ނިމެން ސުން ސިކުންތުގައި ރ. އިބޫ މިގޮތައް ރިއެކްޓް ކުރުމުން އިޚްލާސްތެރިކަން ނެތް މިންވަރު ހާމަވެއްޖެ. އިބޫ ޑެސްޕަރޭޓް ވެއްޖެ." ޖަމީލުގެ ޓްވީޓުގައިވެއެވެ.
ޕާކިން ޖޫރިމަނާ ފިޔަވައި ޓްރެފިކް ޤަވާއިދުތަކާ ޚިލާފުވެގެން ކޮށްފައިވާ ޖޫރިމަނާތައް ދެއްކުމަށް ލުއި ދެވޭނެގޮތް ވެސް ސަރުކާރުން ވަނީ ކަނޑައަޅުއްވާފައެވެ. އެގޮތުން ވަކި ޙާލަތަށް ރިޢާޔަތްކޮށް، ޖޫރިމަނާގެ ބާވަތަށް ބަލައި ޓްރެއިނިންގ ޕްރޮގްރާމެއް ފުރިހަމަ ކުރުމުން ޖޫރިމަނާތަކަށް މަޢާފު ދިނުމަށް ސަރުކާރުން ވަނީ ނިންމަވާފައެވެ.
މީގެ ތެރޭގައި، ލައިސަންސް ލިބިފައިވާ މީހާ ދުއްވި އިރު އަތުގައި ލައިސަންސް ނެތި ދުއްވުމާއި، ލައިސަންސް ގެއްލިފައިވަނިކޮށް ނުވަތަ މުއްދަތު ހަމަވެފައިވަނިކޮށް ނުވަތަ ހަލާކުވެފައިވަނިކޮށް ދުއްވުމާއި، އެއްގިންތިއެއްގެ އުޅަނދު ދުއްވުމުގެ ލައިސަންސް ނެތި ދުއްވުން ނުވަތަ ބޭނުންކުރުން (ލައިސަންސް ނެތި ދުއްވުން) ވެސް ހިމެނެއެވެ. އަދި މީގެ އިތުރުން ވެސް ޖޫރިމަނާގެ ބާވަތުގެ ކުޑަ ބޮޑު މިނަށް ބެލުމަށްފަހު، މި ޓްރެއިނިންގ ޕްރޮގްރާމް ފުރިހަމަ ކުރުމުން މަޢާފުކުރެވޭ ކަންކަން ވެސް ހިމެނެއެވެ.
މި ޓްރެއިންގ ޕްރޮގްރާމް ހިންގުމަށް ހަމަޖެހިފަވަނީ ދިވެހި ފުލުހުންގެ ޚިދުމަތުން، 2 ހަފްތާއާއި 1 މަސްދުވަހަށްވުރެ ދިގު ނުވާނެ ގޮތަކަށެވެ. މިގޮތަށް މިކަން ކުރުމުގެ ބޭނުމަކީ ޓްރެފިކް ޤަވާއިދާ ޚިލާފުވާ ފަރާތްތަކުން، މިފަދަ މައްސަލަތައް ތަކުރާރުވާ މިންވަރު މަދުކުރުމެވެ. އަދި މީގެ ސަބަބުން ޓްރެފިކް ޤަވާއިދުތަކަށާއި، އިޖްތިމާޢީ އެހެން މައްސަލަތަކާ ގުޅޭގޮތުން މީހުން އަހުލުވެރިވާ މިންވަރު އިތުރުކުރެވިގެންދާނެއެވެ.
ޖުރިމައިނާ މާފު ކުރަން ޖެހޭ ކަންކަން އަދިވެސް އެބަހުރި، ދެން ރިސޯޓް އޯނަރުން ވެސް ފުލެޓް ތަކުގެ މީހުންގެ ޖުރިމައިނާވެސް މާފު ކޮށްދެއްވާ !
ޖޫރިމަނާ މާފު ކޮއްދިނީ މުޢިއްޒުތަ؟ ޖަމީލު ޔާމީނުގެ މައްސަލަ ނުނިމިގެން މޮޔަގޮވަނީ. ކިޔޭ ނުކިޔޭ އެއްޗެއްވެސް ނޭނގޭ.
ބަލަގަ މުއިއްޒު އެހެން ވިދާޅުވީމަތޯ މަޢާފު ކުރަން އެނގުނީ؟