ސުވާލެއް ނެތް، އެމްޑީޕީ ރޫޅާލެވިއްޖެ: އީވާ
ދަ ޑިމޮކްރެޓްސް އުފައްދާ ރައީސް ނަޝީދު އެމްޑީޕީ ރޫޅާލާނެކަމަށް ވިދާޅުވި ވިދާޅުވުން ނިމިދިޔަ ރިޔާސީ އިންތިޚާބުގެ ނަތީޖާއިން ހަގީގަތަކަށް ހަދާފައިވާކަން ހާމަވެފައިވާކަމަށް ރައްޔިތުންގެ މަޖިލީހުގެ ނައިބް ރައީސް އީވާ ވިދާޅުވެއްޖެއެވެ.
މަޖިލީހުގެ މިއަދުގެ ޖަލަސާގައި ވާހަކަފުޅުދައްކަވަމުން އީވާ ވިދާޅުވީ މި މަހުގެ 30 ވަނަ ދުވަހު ބާއްވާ ދެވަނަ ބުރުގައި ޑިމޮކްރެޓްސް އިން ނިންމާ ނިންމުމަކީ، ދެން ވެރިކަން ކުރާ ސަރުކާރެއް ކަނޑައަޅާނެ މުހިންމު ނިންމުމެއް ކަމަށެވެ.
“ދެން އަންނަ ސަރުކާރެއްގައި ދެވަނަ ބުރުގައިވެސް އަޅުގަނޑުމެން ދަ ޑިމޮކްރެޓުން އަޅާ ފިޔަވަޅަކީ މުހިންމު ފިޔަވަޅެއް ކަމާއި ދޭތެރޭގައި އެއްވެސް މީހަކު ޝައްކެތް ނުކުރާނެ” އީވާ ވިދާޅުވިއެވެ.
އީވާ ވިދާޅުވީ ރައީސް ނަޝީދަށް ތާއީދު ކުރައްވާ އެތައް މެމްބަރުންނެއް ބާކީކޮށް ނިކަމެތިކޮށް އެކަހެރި ކޮށްގެން ލިބުނު ނަތީޖާ މިއަދު ފެންނަނީ ހިތިކޮށް ކަމަށެވެ. އަދި ޑިމޮކްރެޓްސްއިން ހޯދި ކާމިޔާބީއަކީ ބޮޑު ކާމިޔާބެއް ކަމަށް ވެސް އީވާ ވިދާޅުވިއެވެ.
