ޞައްހަ ވޯޓާއި ބާޠިލް ވޯޓު ކަނޑައަޅާނީ އޮފިޝަލުން، އެކަމުގައި ކޮމިޝަނުން ބަސް ނުބުނާނެ: ހަބީބު

އިންތިޚާބުގެ ވޯޓު ގުނާއިރު އެއީ ޞައްހަ ވޯޓެއްތޯ ނުވަތަ ބާޠިލް ވޯޓެއްތޯ ކަނޑައަޅާނީ ވޯޓު ގުނާ އޮފިޝަލުން ކަމަށާއި އެކަމުގެ ތެރެއަށް އިލެކްޝަންސް ކޮމިޝަނުން ވަދެ، ބަސް ނުބުނާނެ ކަމަށް އެ ކޮމިޝަނުގެ ނައިބު ރައީސް އިސްމާއީލް ހަބީބް ވިދާޅުވެއްޖެ އެވެ.

Ads by Hajj Corporation

މިއަދު އީސީން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ހަބީބް ވިދާޅުވީ ވޯޓު ކަރުދާހުގައި އެއް ފާހަގަ އަދި ފާހަގަ މަތީ ތަކުރާރުކޮށް ނުކުރަހަން އިރުޝާދު ދީފައިވަނީ ވޯޓުގެ ސިއްރުކަން ގެއްލިދާނެތީ ކަމަށެވެ. އަދި އިންތިޚާބާއި ގުޅޭ ވަރަށް ގިނަ ޝަކުވާތައް އާންމުން އީސީގެ މެންބަރުންނަށް ފޮޓޯއާއެކު ވެސް ވަނީ ފޮނުވައިފައިކަމަށާއި ނަމަވެސް އެއީ އީސީގެ މެންބަރުންނަށް ކޮންޓްރޯލް ކުރެވޭނެ ކަމެއް ނޫން ކަމަށް ހަބީބު ވިދާޅުވިއެވެ.

ސެޕްޓެމްބަރު 9 ވަނަ ދުވަހު ބޭއްވި ރިޔާސީ އިންތިޚާބުގައި 4000 އަށް ވުރެ ގިނަ ބާޠިލް ވޯޓު ލާފައިވާއިރު ގިނަ ބަޔަކު ވަނީ ބާޠިލް ވޯޓު ކަނޑައެޅުމުގައި ބަލާ މިންގަނޑާ މެދު ކަންބޮޑުވުން ފާޅުކޮށްފަ އެވެ. ހަބީބު ވިދާޅުވީ އެކަމާ މެދު ގޮތް ނިންމުމުގެ ބާރު ގާނޫނީ ގޮތުން ދީފައި އޮތީ މަރުކަޒުގެ ވެރިޔާއަށް ކަމަށެވެ.

"ވޯޓުގެ ސިއްރުކަން ގެއްލިދާނެ އެއްވެސް ކަމެއް ކުރުމަކީ ގަބޫލުކުރެވޭ ކަމެއް ނޫން. އިތުރު ނިޝާނަކުން ވޯޓުލީ ކާކުކަން ދެނެގަނެވޭ ނަމަ އެއީ ސައްހަ ވޯޓެއްގެ ގޮތުގައި ގުނުމުގެ ފުރުސަތު ކުޑަ... ވޯޓު މަރުކަޒުގެ ވެރިޔާ، އޭނާއަށް ކޮމިޝަނުގެ މެންބަރުންނަށް ގުޅާފައި ތީތި ސައްހަ ކުރަން ވާނޭ އެހެނެއް ނުއެއް ބުނެވޭނެ. އެއީކީ ގާނޫނީ ގޮތުން ވަރަށް މަތީ އިހުތިޔާރަކާއި އިތުބާރެއް ދީފައި އޮތް މީހެއް އެ ވަގުތު. އެކަން ބަލާނަން ބަލާފައި އަޅުގަނޑުމެން ދެ ވަނަ ބުރުގައި އެކަމެއް ރަނގަޅު ކުރާނަން،" ހަބީބް ވިދާޅުވި އެވެ.

މީގެ އިތުުރުން އެކި މަރުކަޒުން ބާޠިލް ވޯޓާމެދު އެކި ގޮތަށް އަމަލުކުރާތީ އެކަމާ މެދު ސުވާލުކުރުމުން ހަބީބް ވިދާޅުވީ އެ މައްސަލަ ފާހަގަވެފައިވާ ކަމަށާއި އެއީ ހިނގާފާނެ ކަމެއް ކަމަށް ގަބޫލުކުރައްވާ ކަމަށެވެ. އަދި، އެއީ އިލެކްޝަންސް ކޮމިޝަނުން އޮފިޝަލުންނަށް ޓްރެއިނިން ދޭ ގޮތަކުން ހިނގާ ކަމެއް ނޫން ކަމަށާއި އެ ކޮމިޝަނުން އިރުޝާދު ދީފައިވާނީ ވީހާ ވެސް ބޮޑަކަށް ސައްހަ ވޯޓު ސައްހަ ވޯޓުގެ މައްޗަށް ބާތިލް ވޯޓު ބާތިލް ވޯޓުގެ މައްޗަށް ކަނޑައެޅުމަށް ކަމުގައި ހަބީބު ވިދާޅުވި އެވެ.

"ކޮމިޝަނަކުން އެއްގޮތަކަށް ބާތިލް ވޯޓާއި ސައްހަ ވޯޓާ ގުޅޭ ގޮތުން އެއްވެސް އިރެއްގައި އެއަކަށް އިރުޝާދެއް ނުދޭނެ. ކިތަންމެ މައްސަލަ ބޮޑުވިޔަސް، މައްސަލަ ބޮޑުވެގެން ކޮމިޝަނާ ހަމައަށް އައި އެ މައްސަލަތައް އެކަމަކު އެކަން ނިންމާނީ ހަމަ މަރުކަޒުގެ ވެރިޔާ. އެއާ ދޭތެރޭގެ ހިތްހަމަނުޖެހުމެއް ކަމަށް ވަންޏާ އެކަން މައްސަލައެއްގެ ގޮތުގައި ހުށަހަޅާނީ،.... ކޮމިޝަނުން ވަކި ލައިނެއް ވަކި ހިސާބަކުން ދެމި ކަމަށް ވިޔަސް އަޅުގަނޑުމެން އެކަން ހަވާލުކޮށްފައި ތިއްބަވާ ބޭފުޅުން އެކަން ކޮށްގެން ވާނީ." ހަބީބް ވިދާޅުވި އެވެ.

އިންތިޚާބުގެ ފުރަތަމަ ބުރުގެ ތަޖުރިބާއަށް ބަލައި ވޯޓު ގުނާއިރުގައި ސިއްރުކަން ހިފަހައްޓައި އެކަން ކުރެވެން އޮތް ގޮތެއް ބަލައި އެކަން ކުރާނެ ކަމަށް ފާހަގަކުރައްވަމުން ހަބީބު ވިދާޅުވީ ދެވަނަ ބުރުގައި ހަރަކާތްތެރިވާ އޮފިޝަލުންނަށް ތަމްރީނު ދިނުމުގައި ވެސް ވީހާވެސް އެއްގޮތް ކުރަން އިސްކަން ދޭނެ ކަމަށެވެ.