އިންތިޚާބުގެ ބޭރުގެ އޮބްސާވަރުންނާއި ދިމާކުރި ދިވެހި މޮނިޓަރުން ސަސްޕެންޑުކުރީ 5 އަހަރަށް
ސެޕްޓެމްބަރު 9 ވަނަ ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގެ ވޯޓުލުމުގެ ތެރެއިން ބިދޭސީ އޮބްޒާވަރަކަށް ފުރައްސާރަކުރުމުގެ މައްސަލައިގައި ދިވެހި މަންދޫބަކާއި އޮބްޒާވަރަކު ސަސްޕެންޑުކުރީ ދެން އަންނަ ރިޔާސީ އިންތިހާބާއި ހަމައަށްކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
އެ މަންދޫބާއި އޮބްޒާވަރުގެ ސަސްޕެންޝަނުގެ މުއްދަތު 5 އަހަރަށް ދެމިގެންދާގޮތަށް އީސީން ނިންމެވީ ދެން ރިޔާސީ އިންތިޚާބެއް އޮންނާނީ ފަސް އަހަރު ކަމުން ވާތީކަމަށެވެ.
އޮންލައިން ނޫހަކަށް މައުލޫމާތުދެއްވަމުން އީސީގެ ނައިބު ރައީސް އިސްމާއީލް ހަބީބު ވިދާޅުވީ، ސަސްޕެންޑުކޮށްފައިވާ މަންދޫބާއި އޮބްޒާވަރަށް ދެން އަންނަ ރިޔާސީ އިންތިހާބާއި ހަަމައަށް އެއްވެސް އިންތިހާބެއްގެ އޮބްޒާވަރެއް، މޮނިޓަރެއް، ކެންޑިޓޭޓެއްގެ މަންދޫބެއް، އަދި އިލެކްޝަން އޮފިޝަލެއްގެ ގޮތުގައިވެސް ހަރަކާތްތެރި ނުވެވޭނެ ކަމަށެވެ.
"އެ ބޭފުޅުން ސަސްޕެންޑުކޮށްފައި ވަނީ ދެން އަންނަ ރިޔާސީ އިންތިހާބަކާ ހަމައަށް. އެހެންވީމަ ކުރިއަށް އޮތް މަޖިލީސް އަދި ލޯކަލް ކައުންސިލް އިންތިހާބުގަ ވެސް އެ ބޭފުޅުންނަށް ހަރަކާތްތެރިއެއް ނުވެވޭނެ،" ހަބީބް ފާހަގަކުރެއްވި އެވެ.
އިންތިހާބު އޮބްޒާވް ކުރަން އައި އިންޑިއާގެ އޮބްޒާވަރުންނަށް ފުރައްސާރަކުރީ ދިވެހި އޮބްޒާވަރަކާއި މަންދޫބެއް ކަމަށާއި އެއީ ސުލޫކީ މިންގަނޑާ ހިލާފު ކަމެއް ކަމަށްވާތީ އެ ކޮމިޝަންގެ ޚާއްސަ ޖަލްސާގައި އެ ދެ މީހުންނާ މެދު ފިޔަވަޅު އަޅާފައިވާއިރު އެ ޖަލްސާގައި ނިންމީ އެ މީހުންނަށް މިމަހުގެ 30 ވަނަ ދުވަހު ބާއްވާ ރިޔާސީ އިންތިހާބުގެ ދެވަނަ ބުރާއި ކުރިޔަށް އޮތް ބޮޑު ދެ އިންތިހާބުގެ އެއްވެސް ކަމެއްގައި އެއްވެސް ހައިސިއްޔަތަކުން ހަރަކާތްތެރި ނުވެވޭ ގޮތަށް ސަސްޕެންޑް ކުރުމަށެވެ.
މީގެ އިތުރުން، ސަސްޕެންޑުކުރި ދެ މީހުންގެ ބަދަލުގައި އޮބްޒާވަރެއް އަދި މަންދޫބެއް ނެގުމުގެ ފުރުސަތު އެ ޕާޓީއަށް ދިނުމަށް ވެސް އިލެކްޝަންސް ކޮމިޝަނުން އޭރު ނިންމާފައިވާއިރު ސޯޝަލް މީޑިއާގައި ދައުރުވި ވީޑިއޯއަކުން ފެންނަ ގޮތުގައި އިންޑިއާގެ ދެ އޮބްޒާވަރަކާ ދިމާލަށް އެދެމީހުން ވަނީ ވަރަށް ހަޑިކޮށް އެއްޗެހި ގޮވާފައެވެ.
އިލެކްޝަން ކޮމިޝަނުން ދައުވަތު ދެއްވައިގެން ވަޑައިގެންނެވި ބޭރުގެ އޮބްޒާވަރުންތަކަކަށް އެގޮތަށް ދިމާކޮށްލުމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށް އިލެކްޝަންސް ކޮމިޝަނުންވަނީ ބުނެފައެވެ.
