ކޯރަމް ހަމަނުވެގެން މަޖިލިސް ޖަލްސާ ނުފެށި ގިނަ އިރުތަކެއް
ރައްޔިތުންގެ މަޖިލީހުގައި މިއަދު ބާއްވަން ތާވަލުކުރި ޖަލްސާ ފަށަން އޮތް ގަޑިން ފެށިގެން ގިނައިރުތަކެއް ހޭދަވި އިރު ވެސް މެމްބަރުން ތަޅުމަށް ވަޑައިނުގެންނެވުމުން ޖަލްސާ ފެށޭ ގޮތެއް ނުވިއެވެ.
މިއަދުގެ ޖަލްސާ ފެށުމާ އެކު ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވަނީ ކޯރަމް ހަމަނުވުމުން އިތުރަށް ބައި ގަޑިއިރު ކޯރަމް ހަމަވޭތޯ މަޑުކުރައްވައިފައެވެ.
ނަމަވެސް މިއަދު 9 ޖެހީއިރު ފެށި ޖަލްސާއަށް އަދިވެސް ކޯރަމް ހަމަވެފައެއް ނުވެއެވެ. ރިޔާސަތުގައި އިންނަވާ ނަޝީދު ވަނީ މަޖިލީހުގެ މެޖޯރިޓީ މެންބަރުން ހިމެނޭ އެމްޑީޕީގެ މެންބަރުން މި ކަމަށް ސަމާލުވުމަށް އެދިވަޑައިގެންފައެވެ. އަދި މަޖިލީހުގެ މެޖޯރިޓީ ލީޑަރު މެންބަރު މުހައްމަދު އަސްލަމް ކޯރަމް ހަމަކޮށްދެއްވުމަށް މަސައްކަތް ކުރައްވާނެކަމަށް އުންމީދު ކުރައްވާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވަނީ އެމްޑީޕީގެ 56 މެންބަރުން ތިއްބަވާ ކަން ފާހަަގަކޮށް މިއަދުގެ ޖަލްސާއަށް އެ ޕާޓީން ގިނަ މެންބަރުން ވަޑައިނުގަންނަވާ ކަން ފާހަގަކުރައްވާފައެވެ.
މަޖިލީހުގެ ގަވައިދު ބުނާގޮތުން މަޖިލީހުގެ ޖަލްސާ ފެށެނީ 22 މެންބަރުން ހާޒިރުވުމުންނެވެ.
