ވެރިކަން ހިންގުމުގެ ބާރު އައު ސަރުކާރަކަށް ބަދަލުވާއިރު ބައެއް ކަންކަމަށް ސަމާލުވުމަށް އޭސީސީން އިލްތިމާސްކޮށްފި
ވެރިކަން ހިންގުމުގެ ބާރު އައު ސަރުކާރަކުން ހަވާލުވުމުގެ ވަގުތު ކުޑަތަންވެފައިވާއިރު، ބައެއް ފަރާތްތަކުން ކޮރަޕްޝަނަށް މަގުފަހިވާ ގޮތަށް ކުއްލި ކަންތައްތަކެއް ކުރާ ކަމުގެ ޝަކުވާ ލިބޭތީ އެފަދަ ބައެއް ކަންކަމާމެދު ސަމާލުވެވަޑައިގަތުމަށް އެންޓި ކޮރަޕްޝަން ކޮމިޝަނުން ދަންނަވައިފިއެވެ.
އޭސީސީން ރޭ ނެރުނު ބަޔާނެއްގައި ވަނީ ރިޔާސީ އިންތިޚާބު ނިމި، ވެރިކަން ބަދަލުވާން ކައިރިވެފައި އޮތް އިރު، ބައެއް ފަރާތްތަކުން ކޮރަޕްޝަނަށް މަގުފަހިވާ ގޮތަށް ކުއްލި ކަންތައްތަކެއް ކުރުމަށް ނިންމަމުން ގެންދާކަމުގެ ގިނަ ޝަކުވަތަކެއް ކޮމިޝަނަށް ލިބެމުންދާތީ، ސަރުކާރުގެ އޮފީސްތަކާއި، ދައުލަތުގެ އިދާރާތަކާއި، މުއައްސަސާތަކާއި، ސަރުކާރުގެ އަދި ސަރުކާރު ހިއްސާވާ ކުންފުނިތަކުން ޢަމަލުކުރާނެ ގޮތްތަކެއް ދަންނަވާފައެވެ.
އެގޮތުން މުޅިން އައު މަޝްރޫއުތައް ނުފެށުމަށާއި، ޚަރަދުކުރުމުގައި، ކޮރަޕްޝަނަސް މަގުފަހިވެދާނެ ގޮތްތަކަށް ޢަމަލުނުކޮށް ކުރަންޖެހޭ ޚަރަދުތައް ފިޔަވައި އައު ކަންކަން ނިންމައިގެން ޚަރަދުނުކުރުމާއި، ކުރިން ބަޖެޓުކޮށްފައިނުވާ ނުވަތަ ޕްލޭންކޮށްފައިނުވާ އައު މަޝްރޫއުތައް ހިންގުމަސް އެއްބަސްވުންތަކުގައި ސޮއިނުކުރުން ހިމެނެއެވެ.
މީގެ އިތުރުން، ނިންމާ އެއްވެސް ނިންމުމެއްގެ ސަބަބުން ކޮރަޕްޝަނުގެ ޢަމަލަކަސް މަގުފަހިވާ ގޮތަކަށް ކަމެއް މެދުވެރިވެދާނެ އިޙްމާލު އޮތްނަމަ އެފަދަ ނިންމުންތައް ނުނިންމުމަށާއި، ލިޔެކިޔުން ރައްކާތެރިކޮށް ބަލަހައްޓައި، ފައިސާއާއި ވިޔަފާރިއާއި މުޢާމަލާތްތަކާ ގުޅުންހުރި އެއްވެސް ލިޔެކިޔުމެއް ނައްތައިނުލުމަށް އޭސީސިން ވިދާޅުވެފައިވެއެވެ.
އެހެންކަމުން އެކަންކަމުގައި އޮފީސްތަކާއި، އިދާރާތަކާއި، ކުންފުނިތައް އަދި މުއައްސަސާތަކުގެ ޒިންމާދާރު މަޤާމުތަކުގައި ތިއްބެވި ބޭފުޅުން ސަމާލުކަން ދެއްވުމަށް އޭސީސީން އެދިވަޑައިގެންފައިވެއެވެ.
ހަމަ އެއާއެކު، އެފަދަ ޢަމަލެއް ހިނގާކަމުގެ މަޢުލޫމާތު އެއްވެސް ފަރާތަކަށް ލިބިއްޖެނަމަ، އެކަމުގެ މަޢުލޫމާތު އެ ކޮމިޝަނާ ޙިއްސާކުރެއްވުމަށް އިލްތިމާސްކުރައްވާފައިވެއެވެ. އެފަދަ ޢަމަލުތައް ހުއްޓުވައި އަޅަންޖެހޭ ހުރިހާ ފިޔަވަޅެއް އަޅުއްވާނެކަމުގެ ޔަޤީންކަންވެސް އެ ކޮމިޝަނުން ދިވެހި ރައްޔިތުންނަށް ދެއްވާފައިވެއެވެ.
Ads by STO
