ޤައުމީ ފަތުރުވެރިކަމުގެ ދުވަސް ފާހަގަކުރުން، މި މަހުގެ 12 ވަނަ ދުވަހަށް ފަސްކޮށްފި
ޤައުމީ ފަތުރުވެރިކަމުގެ ދުވަހާއި ގުޅޭ ޚާއްސަވހަފްލާ މި މަހުގެ 12 ވަނަ ދުވަހު ބާއްވާ ގޮތަށް ހަމަޖެހިއްޖެއެވެ.
ރާއްޖެ ޓީވީގެ "ފަސްކާފު" ޕްރޮގްރާމްގައި ވާހަކަ ދައްކަވަމުން، ޓޫރިޒަމް މިނިސްޓަރު މައުސޫމް ވިދާޅުވީ، ނެޝަނަލް ޓޫރިޒަމް ޑޭ ފާހަގަ ކުރަނީ މި މަހުގެ ފުރަތަމަ ދު ދުވަހުގައި ކަމަށާއި، ދުވަސް ފާހަގަ ކުރުން ފަސް ކުރީ މި އަހަރުގެ ރިޔާސީ އިންތިޚާބަށް ފަހުގައި، އެކަމަށް ހަމަޖެހިލައިގެން ތައްޔާރުވެގެން، ދުވަސް ފާހަގަ ކުރުމަށް ކަމަށެވެ.
ބާރަ ވަނަ ދުވަހު ދޭ މޯލްޑިވްސް ޓޫރިޒަމް އެވޯޑްސްއަށް ހުޅުވައިލުމުން، ވަރަށް ގިނަ ފަރާތްތަކުން ނަން ހުށަހެޅިކަން ފާހަގަކުރައްވައި، އެވޯޑް ވާދަވެރި ވެގެންދާނެ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ، ޤައުމީ ފަތުރުވެރިކަމުގެ ދުވަސް، މި މަހުގެ އެއްވަނަ ދުވަހު ފާހަގަކުރަން ނިންމީ، މިދިޔަ މަހުގެ 27 ވަނަ ދުވަހު ފާހަގަކުރާ، ބައިނަލްއަޤްވާމީ ފަތުރުވެރިކަމުގެ ދުވަހާއިއެކުގައި، ފަތުރުވެރިކަމުގެ ހަފްތާއެއް ފާހަގަ ކުރުމަށް ކަމަށެވެ.
ޤައުމީ ފަތުރުވެރިކަމުގެ ދުވަސް އެންމެ ފުރަތަމަ ފާހަގަކުރީ މިދިޔަ އަހަރު، ރާއްޖޭގެ ފަތުރުވެރިކަމުގެ ރަންޔޫބީލްއާއި ގުޅިގެންނެވެ.
