އެމްޑީޕީގެ ޤައުމީ މަޖިލީހުން އެދެނީ ބަރުލަމާނީ ނޫންގޮތެއް
ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުޙައްމަދު ޞާލިޙާއި ދެކޮޅަށް އެ ޕާޓީގެ ކުރީގެ ރައީސް މުހައްމަދު ނަޝީދާއި ޑިމޮކްރެޓްސް އިން މަސައްކަތް ކޮށްފައި، ނަޝީދު އެދިވަޑައިގަންނަވާ ބަރުލަމާނީ ނިޒާމު ގެންނަން ތާއީދުނުކުރާ ކަމަށް އެމްޑީޕީގެ ގައުމީ މަޖިލީހުގެ މެމްބަރުން މިރޭ ވިދާޅުވެއްޖެއެވެ.
ޤައުމީ މަޖިލީހުން ވަނީ ބަރުލަމާނީއަށް ތާއީދު ނުކުރަން ނިންމައި، ޤަރާރެއް ވެސް ފާސްކޮށްފައެވެ.
ވެރިކަމުގެ ނިޒާމު ބަދަލުކުރުމާ ގުޅޭގޮތުން އެމްޑީޕީން ގޮތެއް ނިންމުމަށް ކުރިޔަށް ދިޔަ ޤައުމީ މަޖިލީހުގެ ބައްދަލުވުމުގައި 90 މެމްބަރުން ބައިވެރިވެވަޑައިގެންނެވިއިރު، އެ ތަނުގައި ވާހަކަ ދެއްކެވި ހުރިހައި މެމްބަރުން ކަހަލަ ގޮތަކަށް، ވެރިކަމުގެ ނިޒާމު ބަދަލު ކުރުމާއި ދެކޮޅު ހެއްދެވިއެވެ.
ފޮރިން މިނިސްޓަރު ޝާހިދު ވިދާޅުވީ އެމްޑީޕީ އަކީ ފެށުނީއްސުރެ ޒިންމާދާރު އިދިކޮޅު ޕާޓީއެއް ކަމަށާއި ނާކާމިޔާބުވުމުން ވާދަވެރި ކެންޑިޑޭޓަށް ވެރިކަން ކުރުމުގެ ފުރުސަތު ނުދިނުމަކީ އެމްޑީޕީގެ ވިސްނުމާއި ޚިލާފު ކަމެއް ކަމަށެވެ.
އެމްޑީޕީގެ ޗެއާޕަސަންގެ ނައިބު އިބްރާހީމް ވަހީދު(އިބުރޭ) ވެސް ބަރުލަމާނީއާއި ދެކޮޅު ހައްދަވައި ވިދާޅުވީ، އޭރު ޑިމޮކްރެޓުން އެދުނީ ރައީސް އިބްރާހީމް މުޙައްމަދު ޞާލިޙު ނޫން ގޮތެއް ކަމަށާއި، މިއަދު އެމްޑީޕީ އެދެނީ ބަރުލަމާނީ ނޫން ގޮތެއް ކަމަށެވެ.
އަދި ޕްލޭނިން މިނިސްޓަރު މުޙައްމަދު އަސްލަމް ވިދާޅުވީ މެޖޯރިޓީ އަށް ތަބާވުމަކީ ޑިމޮކްރަސީގެ އަސާސީ ސިފަ ކަމަށާއި، ރައްޔިތުން ގޮތެއް ނިންމާފައިވަނިކޮށް، އެ ނިންމުމަށް ގޮންޖަހައި، މުޅިން އެހެން ގޮތަކަށް ވެރިކަން ހޯދަން ތާއީދުނުކުރައްވާ ކަމަށެވެ.
