ރައީސް ނަޝީދު މަޤާމުން ވަކިކުރުމަށް ހުށަހެޅި ޤަރާރު މަޖިލީހުން ބަލައިގެންފި
ރައްޔިތުންގެ މަޖިލީހުގެ ރައީސް މުޙައްމަދު ނަޝީދު، މަޤާމުން ވަކިކުރެއްވުމަށް ހުށަހެޅި ޤަރާރު މަޖިލީހުން ބަލައިގެންފިއެވެ.
މަޖިލިސް އިދާރާއިން ވިދާޅުވީ ރައީސް ނަޝީދު މަޤާމުން ވަކިކުރުމުގެ ޤަރާރެއް ރައްޔިތުންގެ މަޖިލީހުގެ އިދާރާއަށް މިއަދު ލިބިފައިވާ ކަމަށެވެ. އަދި އެ މައްސަލަ ޤާނޫނު އަސާސީއާއި ރައްޔިތުންގެ މަޖިލީހުގެ ޤަވާއިދުގައިވާ ގޮތުގެ މަތިން ކުރިއަށްގެންދެވޭނެ ކަމަށް ވިދާޅުވިއެވެ.
މި ޤަރާރު ހުށަހަޅާފައިވާއިރު 48 މެމްބަރުންގެ ސޮޔާއެކު ރައީސް ނަޝީދުގެ އިތުބާރު ނެތް ކަމުގެ މައްސަލަ ވެސް މިއަދު ވަނީ މަޖިލީހަށް ހުށަހަޅާފައެވެ. އެމްޑީޕީގެ ޕާލަމެންޓަރީ ގްރޫޕުން އެ މައްސަލަ ފާސްކުރީ އިއްޔެ ބޭއްވި އެމްޑީޕީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
މަޖިލީހަށް ހުށަހަޅާފައިވާ ރައީސް ނަޝީދުގެ އިތުބާރު ނެތްކަމުގެ މައްސަލައިގެ ގަރާރުގައި ބުނެފައިވަނީ މަޖިލީހުގެ އެޖެންޑާ ކަނޑައެޅުމާއި މަޖިލީހުގެ ތަޅުމަށް ކަންކަން ގެނައުމުގައި އެމަނިކުފާނުގެ އަމިއްލަ މަސްލަހަތު އިސްކޮށް ވަކި ފަރާތަކަށް ބުރަވެ، މަޖިލީހުގެ ގަވާއިދާ ޚިލާފަށް ކަންކަން ނިންމަމުންދާ ކަމަށާއި، މުޅި މަޖިލީހުގެ ނިޒާމު ހިފެހެއްޓުމުގެ ބަދަލުގައި މަޖިލީހުގެ ނިޒާމު ގެއްލުވާލުމަށް މަސައްކަތް ކުރާ ފަރާތްތަކަށް ރައީސް ނަޝީދު ވާގިވެރިވަމުން ގެންދާ ކަމަށެވެ.
މީގެ އިތުރުން، މަޖިލިސް އެތައް ދުވަހެއް ވަންދެން ހުއްޓުވާފައި ބޭއްވުމަށް ފަހު، އެ މަނިކުފާނުގެ މަސްލަހަތު އޮތް އެހެން މައްސަލަތަކެއް މަޖިލީހަށް ތާވަލު ކުރުމަށް ފަހު އެ މައްސަލަ ކުރިއަށް ގެންދިއުމަށް ޖަލްސާތައް ބާއްވާފައިވާކަމަށްވެސް އެ ގަރާރުގައި ބުނެފައިވެއެވެ.
