ކޮވިޑުން ރަނގަޅުވެގެން ރަށަށް ދާ މީހުން ކަރަންޓީނު ވާކަށް ނުޖެހޭނެ: އެޗްޕީއޭ
ކޮވިޑް-19 ޖެހުމަށް ފަހު ރަނގަޅުވާ މީހުން ތިން މަސް ދުވަހުގެ ތެރޭގައި ބަލި ޖެހިފައި ހުރި މީހަކާއި ބައްދަލުވި ނަމަވެސް އަދި އިތުރު އެހެން ކަމެއް ދިމާވި ނަމަވެސް އެމީހަކު ކަރަންޓީން ކުރަން ނުޖެހޭ ގޮތަށް އެޗްޕީއޭ އިން އުސޫލެއް އެކުލަވާލައިފިއެވެ.
އެ އުސޫލުގައި ބުނެފައި ވަނީ ކޮވިޑް-19 އާ ބެހޭގޮތުން މިހާތަނަށް ހޯދިފައިވާ ސައިންޓިފިކް ހޯދުންތަކުން، ބައްޔަށް ފައްސިވެ، ބަލިން ރަނގަޅުވެފައިވާ މީހުންގެ ފަރާތުން ބަލި ފެތުރޭކަން ކަށަވަރުކުރެވިފައި ނުވާ ކަމަށެވެ.
އުސޫލު ބުނާ ގޮތުން ކޮވިޑް-19 ގެ އަލާމާތެއް ނެތް ނަމަ، ކޮވިޑް-19 އަށް ފައްސިވެފައިވާ މީހެއްގެ ކޮންޓެކްޓެއް ކަމުގައި ވީނަމަވެސް ބަލިން ރަނގަޅު ވެފައިވާ މީހާ ކަރަންޓީން ކުރާކަށް ނުޖެހޭނެއެވެ. ރާއްޖޭގެ އެއްރަށުން އަނެއް ރަށަށް ދަތުރު ކުރުމުގައި ވެސް އެމީހަކު ކަރަންޓީން ކުރާކަށް ނުޖެހޭނެއެވެ.އަދި ކޮވިޑް-19 އާ ގުޅިގެން އެމީހަކު ދިރިއުޅޭ ގެއަށް ވަދެ ނުކުތުން މަނާކުރެވިފައިވާ ހާލަތުގައި ކަރަންޓީނުގައި ވެސް ހުންނާކަށް ނުޖެހޭނެއެވެ. މީގެ އިތުރުން އެހެން އެއްވެސް ކަމަކާ ގުޅިގެން ޓެސްޓްކޮށް ކޯވިޑް-19 އަށް ފައްސިވުމުން އައިސޮލޭޓް ކުރާކަށް ވެސް ނުޖެހޭނެ ކަމަށް އުސޫލުގައި ބުނެއެވެ.
މީގެ އިތުރުން ވަޒީފާއަށް ނުވަތަ މަސައްކަތަށް ނުކުތުމުގެ ބޭނުމުގައި ކޮވިޑަށް ޕީސީއާރް ޓެސްޓްކުރުމާއި، ބަލީގެ އަލާމާތެއް ނެތް ނަމަ، ކޮވިޑް19 އަށް ފައްސިވެފައިވާ މީހެއްގެ ކޮންޓެކްޓަކަށް ވާތީ ޓެސްޓުކުރުމާއި ބަލި ކޮންޓްރޯލް ކުރުމުގެ ގޮތުން ކުރިއަށް ގެންދާ ސަވައިލަންސްގެ ތެރެއިން ޓެސްޓުކުރުމުން އެމީހުން އިސްތިސްނާ ވާނެއެވެ.
ކޮވިޑް-19 އާ ބެހޭގޮތުން ހޯދޭ ސައެންޓިފިކް ހޯދުންތަކުގެ އަލީގައި މި އުސޫލަށް ބަދަލު އައުމަކީ އެކަށީގެންވާ ކަމެއް ކަމަށް ވެސް އެޗްޕީއޭ އިން ބުންޏެވެ.
