އެއްވެސް ރަށެއްގައި ހިނގާ އެއްވެސް މަޝްރޫއެއް ހުއްޓާލަން އަންގާފައެއް ނުވާނެ: ޑރ. މުއިއްޒު
އެއްވެސް ރަށެއްގައި މިހާރު ހިންގަމުންދާ އެއްވެސް މަޝްރޫޢެއް ހުއްޓާލުމަށް ނުވަތަ މަޑުޖައްސާލުމަށް އަންގާފައި ނުވާނެކަމަށް އިންތިޚާބީ ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި އެމަނިކުފާނު މިހެން ވިދާޅުވީ އަދުގެ ސަރުކާރުން ފަށާފައިވާ މަޝްރޫޢުތައް، ސަރުކާރު ބަދަލުވުމުގެ މި މަރުހަލާގައި ހުއްޓާލުމަށް ބުނަމުންދަނީ އެމަނިކުފާނުގެ އެންގެވުމަށްކަމަށް ބުނެ ދެކެވޭ ވާހަކަތަކާއި ގުޅިގެންނެވެ.
"އެއްވެސް ރަށެއްގައި ހިނގާ އެއްވެސް މަޝްރޫއެއް ހުއްޓާލަން، ނޫނީ މަޑުޖައްސާލަން އަޅުގަނޑު ނުދަންނަވަން. އަދި އަޅުގަނޑުގެ ފަރާތުން އެއްވެސް ބޭފުޅަކުވެސް އެކަހަލަ އެންގުމެއް ނާންގާނެ. ބައެއް ރަށްތަކުގައި މަސައްކަތް ހުއްޓާލައި މެޝިނަރީ ތައް ބާލަމުން ދާކަމާއި، އެކަން ކުރަނީ އަޅުގަނޑު އަންގައިގެންކަމަށް ދައްކާ ޙަޤީޤަތެއްނެތް ވާހަކަތަކާއި ގުޅިގެން، ރައްޔިތުންނަށް ޔަޤީންކަން ދިނުމުގެ ގޮތުން ދަންނަވާލަން. ޝުކުރިއްޔާ"
ޑރ. މުޙައްމަދު މުއިއްޒު
ރިޔާސީ އިންތިޚާބުގެ ދެވަނަ ބުރުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުއާ ވާދަކުރައްވައި ކާމިޔާބުކުރެއްވި ޑރ. މުއިއްޒު ވަނީ ބައެއް ސަކުރާރުގެ އިދާރާތަކުގެ ބަޖެޓަށް ބޮޑެތި ބަދަލު އަންނަ ފަދަ ކަންތައްތައް ނުކުރުމަށާއި، ސިޔާސީ މަޤާމުތައް ނުދިނުމަށާއި އާ މަޝްރޫޢުތައް ނުފެށުމަށާއި މިފަދަ ހަތްކަމަކަށް އެދިވަޑައިގެންފައެވެ.
މިކަމާއި ގުޅިގެން ސަރުކާރު ބައެއް ބޭފުޅުން ދަނީ ޑރ. މުއިއްޒުއަށް އެގޮތަށް މަސައްކަތްތައް ނުފެށުމަށް ނުވަތަ މަޑުޖެއްސުމަށް އެދިވަޑައިގެންނެވިދާނެކަމަށް ޤަބޫލުނުކުރައްވާކަމަށް ވިދާޅުވަމުންނެވެ.
