އަޅުގަނޑުގެ ސަރުކާރެއްގައި ވަކި ޤައުމެއް ރުއްސުމަށް އެ ޤައުމާއި އެއްކޮޅަށް މަސައްކަތެއް ނުކުރާނަން: ޑރ. މުޢިއްޒު
އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރެއްގައި ވަކި ޤައުމެއް ރުއްސުމަށްޓަކައި އެ ޤައުމަކާއި އެއްކޮޅަށް މަސައްކަތް ނުކުރައްވާނެކަމަށް އެމަނިކުފާނު ވިދާޅުވެއްޖެއެވެ.
ރިޔާސީ އިންތިޚާބު ކާމިޔާބު ކުރެއްވުމަށްފަހު ފުރަތަމަ ފަހަރަށް ބޭރުގެ މީޑިއާ އަކަށް ދެއްވި އިންޓަރވިއުގައި އަސްކަރީ އެއްބާރުލުން ބެލެންސް ކުރުމަށް ޤައުމުތަކާ އެކު އޮންނަ ގުޅުން ފުޅާކުރާނަންތޯ ސުވާލުކުރެއްވުމުން ޑރ. މުޢިއްޒު ވިދާޅުވީ އިންޑިއާއާއި އޮންނަ ގުޅުން "ބެލެންސް" ކުރުމަށްޓަކައި އެހެން އަސްކަރީތަކަށް ރާއްޖެއިން ގާޖަ ނުދެވޭނެކަމަށާއި އެއީ އެމަނިކުފާނުގެ ސިޔާސަތެއް ނޫންކަމަށެވެ.
"އަޅުގަނޑުމެންނަކީ ވަރަށް ކުޑަ ޤައުމެއް. އެހެން ބޮޑެތި ޤައުމުތަކާ ގުޅެން އަޅުގަނޑުމެން ބޭނުމެއް ނޫން. އަޅުގަނޑުމެން ބޭނުންވަނީ އެއާ އެކީގައި ނިއުޓްރަލްވާން. އަދި ހަމައެކަނި އިންޑިޔާއާ ބެލެންސް ކުރުމަށްޓަކައި އެހެން އަސްކަރީ ޕްރެޒެންސެއް ނުވަތަ ކޯޕަރޭޝަނެއް އުފައްދަން އަޅުގަނޑުމެން ބޭނުމެއް ނޫން، އެއީ އަޅުގަނޑުމެންގެ ސިޔާސަތެއް ނޫން" ޑރ. މުޢިއްޒު ވިދާޅުވިއެވެ.
މީގެ އިތުރުން ޑރ. މުޢިއްޒުގެ ސަރުކާރެއްގައި ޗައިނާއާ ދެމެދު އޮންނަ ގުޅުން އިތުރަށް ހަރުދަނާކުރުމަށް ދެކެވޭ ވާހަކަތަކާއި ގުޅިގެން އެމަނިކުފާނު ވިދާޅުވީ ވަކި ޤައުމެއް ރުއްސުމަށް އެ ޤައުމަކާ އެއްކޮޅަށް މަސައްކަތްކުރައްވަން އެމަނިކުފާނު ނުވިސްނަވާ ކަމަށާއި އެންމެ ފުރަތަމަ އިސްކަން ދެއްވާނީ ރާއްޖޭގެ ޤައުމިއްޔަތަށާއި ރާއްޖޭގެ ރައްކާތެރިކަމަށްކަމަށެވެ.
"އެއީ އަޅުގަނޑު ޤައުމު ހިންގަން އުޅޭ ގޮތެއް ނޫން. އަދި ވަކި ޤައުމަކާ އެއްކޮޅަށް އެމީހުން ރުއްސުމަށް މަސައްކަތް ނުކުރާނަން. ރާއްޖޭގެ ޤައުމިއްޔަތަށް އެންމެ ފުރަތަމަ ވިސްނަންޖެހޭނީ... އަޅުގަނޑު ބޭނުންވަނީ އަޅުގަނޑުމެންގެ ޤައުމީ މަސްލަހަތުގެ ރައްކާތެރިކަން ކަށަވަރުކޮށްދިނުމަށް. އެއީ އަޅުގަނޑުގެ ސިޔާސަތަކީ، އެސިޔާސަތާއެކު، އެކަމަށް ފުރިހަމައަށް އިޙްތިރާމްކުރާ ކޮންމެ ޤައުމަކީ، އަޅުގަނޑުމެންގެ ގާތް ރަޙުމަތްތެރިއަކަށް ވެގެންދާނެ" ޑރ. މުޢިއްޒު ވިދާޅުވިއެވެ.
މީގެ އިތުރުން، މި ސަރުކާރުން އިންޑިއާ ސަރުކާރުގެ އަތުން ނަގާފައިވާ ލޯނުތަކާއި ގުޅިގެން ވާހަކަފުޅު ދައްކަވަމުން ޑރ. މުޢިއްޒު ވިދާޅުވީ، ރާއްޖޭގައި ހުންނަވާ އިންޑިއާ ސަފީރު މުނޫ މަހާވަރާއި ބައްދަލުކުރައްވާ ކުރެއްވުނު މަޝްވަރާތަކުގައި އިންޑިއާއިން ނަގާފައިވާ ލޯނުތައް ރީފައިނޭންސް ކުރާނެ ގޮތަކާމެދު މަޝްވަރާ ކުރެވުނު ކަމަށެވެ.
ރާއްޖޭގެ ކޮރަޕްޝަނާ ގުޅުންހުރި ބައެއް ނާޒުކު މައްސަލަތަކަށްވެސް އެ އިންޓަވިއުގައިވަނީ އަލިއަޅުވާލާފައެވެ. އެގޮތުން ޑރ. މުޢިއްޒުގެ ސަރުކާރެއްގައި ކޮރަޕްޝަންތަކާއި ގުޅިގެން ޢަމަލުތައް ބަހައްޓަވާނީ ކޮން ގޮތަކަށްތޯ ކުރެއްވި ސުވާލަށް ޖަވާބުދެއްވަމުން އެމަނިކުފާނު ވިދާޅުވީ، މި ސަރުކާރަށް 5 އަހަރު ލިބުނުއިރުވެސް ކޮރަޕްޝަނުގެ ސަބަބުން ގެއްލުނު އެއްވެސް މުދަލެއް ހޯދިފައިނުވާކަމަށެވެ. އަދި އެމަނިކުފާނު ސަރުކާރެއްގައި އެފަދަ އަމަލުތައް ހުއްޓުވައި ސަރުކާރުގެ ހުރިހާ ވުޒާރާތަކާއި ސަރުކާރު ހިއްސާވާ ހުރިހާ ތަންތަން ޖަވާބުދާރީ ކުރުވާނެކަމުގެ ޔަޤީންކަން އެމަނިކުފާނު ދެއްވިއެވެ.
"މި ސަރުކާރަށް 5 އަހަރު ވީއިރު، ގެއްލުނު އެއްވެސް މުދަލެއް އެމީހުން ހޯދާފައެއް ނުވެއެވެ. އަޅުގަނޑު ޔަޤީންކުރަން ބޭނުންވަނީ އެފަދަ ކަންކަން އަޅުގަނޑުގެ ސަރުކާރެއްގައި ވަރަށް ހަލުވިކޮށް ކުރިއަށްދާނެކަން. އެއީ އެއްވެސް ޤާނޫނީ މައްސަލައެއްގެ ސަބަބުން ވާކަމެއް ނޫން... މި ހުރިހާ ލޫސް އެސެޓްތަކެއް ހޯދުމަށް ޙަޤީޤީ މަސައްކަތެއް ކުރާނަމަ، އެކަން ފަސޭހައިން ކުރެވިދާނެ" ޑރ. މުޢިއްޒު ވިދާޅުވިއެވެ.
އަދި އެމަނިކުފާނު ބޭނުންފުޅުވަނީ މުޅި ސަރުކާރުން ކޮރަޕްޝަނާއި ދުރުވުން ކަމަށާއި އެކަން އެގޮތަށް ހިނގާތޯ އެމަނިކުފާނު ކަށަވަރުކުރައްވާނެކަމަށްވެސް ޑރ. މުޢިއްޒު ވިދާޅުވިއެވެ.
