އަންނަ އަހަރަށް މަޖިލީހަށް 187 މިލިއަން ރުފިޔާގެ ބަޖެޓެއް ކަނޑައަޅައިފި
އަންނަ އަހަރަށް ރައްޔިތުންގެ މަޖިލީހުގެ އިދާރީ މަސައްކަތްތަކާއި ހިންގުމުގެ ޚަރަދަށް 187 މިލިއަން ރުފިޔާގެ ބަޖެޓެއް ކަނޑައަޅައިފިއެވެ.
މިއަދު ބޭއްވި މަޖިލީހުގެ އާއްމު ކޮމިޓީގެ ބައްދަލުވުމުގައި އަންނަ އަހަރަށް ލަފާކުރާ މަޖިލީހުގެ ބަޖެޓާއި ގުޅޭގޮތުން މަޝްވަރާ ކުރުމަށް ފަހު މަޖިލީހުގެ އިދާރާއިން ވަނީ އަންނަ އަހަރު މަޖިލިސް ހިންގުމަށް 187 މިލިއަނެއްހާ ރުފިޔާ ޚަރަދުވާނެ ކަމަށް ލަފާކޮށްފައެވެ.
އެގޮތުން މިއީ މި އަހަރަށް ރައްޔިތުންގެ މަޖިލީހުގެ އިދާރީ މަސައްކަތްތަކާއި ހިންގުމުގެ ޚަރަދުތަކަށް ފާސްކޮށްދިން 182 މިލިއަން ރުފިޔާގެ ބަޖެޓާއި އަޅާބަލާއިރު އިތުރު އަދަދެކެވެ.
މަޖިލީހުގެ އިދާރާއިން ބުނީ މި އަހަރަށްވުރެ އަންނަ އަހަރަށް ފާސްކުރާ ބަޖެޓް ބޮޑުވާނެ ކަމަށް ލަފާ ކުރަނީ އަންނަ އަހަރު އިތުރަށް އިންތިހާބު ކުރާ މެމްބަރުންގެ ޚަރަދުތައް ހަމަޖައްސަން ޖެހޭނެތީ ކަމަށެވެ.
ހަމަ އެހެންމެ މި ދައުރުގައި ބަޖެޓް ކޮމިޓީ އެކުލަވާލުން ލަސްވަމުންދާތީ އެ އިދާރާއިން ފިނޭންސް މިނިސްޓްރީއަށް ބަޖެޓު ހުށަހަޅާފައިވާ ކަމަށް މަޖިލީހުގެ އިދާރާއިން ވަނީ މިއަދު ބޭއްވި މަޖިލީހުގެ އާއްމު ކޮމިޓީގެ ބައްދަލުވުމުގައި ބުނެފައެވެ.
މީގެ އިތުރުން މަޖިލީހުގެ އިދާރާއިން އާއްމު ކޮމިޓީއަށް ހުށަހަޅާފައިވާ ބަޖެޓަކީ ފިނޭންސް މިނިސްޓްރީގެ މަޝްވަރާއާއެކު އެކުލަވާލާފައިވާ ބަޖެޓެއް ކަމަށް މަޖިލީހުގެ އިދާރާއިން ވަނީ ބުނެފައެވެ.
މިހާރު ހިނގަމުން އަންނަ 19 ވަނަ ރައްޔިތުންގެ މަޖިލީހުގައި 87 ދާއިރާ ހިމެނޭ އިރު ރައްޔިތުންގެ މަޖިލީހުގެ 20 ވަނަ ދައުރަށް މިހާރު ވަނީ 6 ދާއިރާއެއް އިތުރު ކޮށްފައެވެ.
މިގޮތުން ބ. އަތޮޅަށް އެއް ގޮނޑި، ކ. އަތޮޅަށް އެއް ގޮނޑި، މާލެއަށް ދެ ގޮނޑި، ގއ. އަތޮޅަށް އެއް ގޮނޑި އަދި އައްޑުއަށް އެއް ގޮނޑި ވަނީ އިތުރުކޮށްފައެވެ.
