އަންނަ އަހަރުގެ ބަޖެޓުގައި،ހިޔާ ޓަވަރުތަކުގައި އިތުރު ލިފްޓް ހަރުކުރުމަށް ހިމަނައިފިން: ޑރ. މުޢިއްޒު
އަންނަ އަހަރަށް ލަފާކުރާ ދައުލަތުގެ ބަޖެޓުގައި، ހިޔާ ޓަވަރުތަކުގައި އިތުރު ލިފްޓް ހަރުކުރުމަށް ހިމަނާފައި ވާނެ ކަމަށް އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޑރ. މުޢިއްޒު މިހެން ވިދާޅުވީ މިއަދު ހަވީރު، ހުޅުމާލޭ ދެވަނަ ފިޔަވަހީގެ ހިޔާ ފްލެޓުތައް ހިމެނޭ ސަރަޙައްދަށް ވަޑައިގެން ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
ހިޔާ ފްލެޓުތަށް ސަރަޙައްދަށް ވަޑައިގެން ރައްޔިތުންނާ ބައްދަލު ކުރެއްވުމުގައި އިންތިޚާބީ ރައީސްގެ އަރިހުގައި، އިންތިޚާބީ ނާއިބު ރައީސް ޙުސައިން މުޙައްމަދު ލަޠީފްވެސް ބައިވެރިވެވަޑައިގަތެވެ.
އެ ސަރަހައްދުގެ ރައްޔިތުންނާއި މުޚާޠަބުކުރައްވާ ޑރ. މުޢިއްޒު ދެއްކެވި، ވާހަކަފުޅުގައި ވިދާޅުވީ، އަންނަ އަހަރަށް ލަފާކޮށް މި ސަރުކާރުން އެކުލަވާލާ ބަޖެޓުގައި، އައު ސަރުކާރުން ހިމަނަން ބޭނުންވާ ކަންކަން ހިމެނުމުގެ ފުރުޞަތު ލިބިވަޑައިގެންފައިވާ ކަމަށެވެ.
އެހެންކަމުން އަންނަ އަހަރުގެ ބަޖެޓުގައި އެއްކަމަކަށް ހިމަނުއްވާފައި ވާނީ، ހިޔާ ފްލެޓުގެ ކޮންމެ ޓަވަރެއްގައި އިތުރު 2 ލިފްޓް ހަރުކުރުމަށް ކަމަށް ޑރ. މުޢިއްޒު ވަނީ ވިދާޅުވެފައެވެ.
މިގޮތުން ކޮންމެ ޓަވަރެއްގައި 2 ލިފްޓް ހަރުކުރާއިރު، އޭގެތެރޭގައި ބަލިމީހުން އުފުލޭނެ ލިފްޓަކާއި، 14 މީހުންގެ ޖާގައިގެ ލިފްޓެއް ހިމެނޭނެ ކަމަށާއި ކެމްޕޭނުގައި ވަޢުދުވެލައްވާފައިވާ ފަދައިން އެކަން ތަންފީޒު ކޮށްދެއްވާނެ ކަމަށް ޑރ. މުޢިއްޒު ވަނީ ވިދާޅުވެފައެވެ.
ހިޔާގެ 16 ޓަވަރުގެ ތެރެއިން ކޮންމެ ޓަވަރެއްގައި 3 ނުވަތަ 2 ލިފްޓުހުރި ނަމަވެސް މި ޓަވަރުތަކުގައި ލިފްޓްތައް މަދުވުމުގެ ޝަކުވާއަކީ ފްލެޓްތަކުގައި ދިރިއުޅޭ އާއްމުންގެ ޝަކުވާއެކެވެ.
