ކޯރަމް ހަމަނުވާތީ މިއަދުގެ މަޖިލިސް ޖަލްސާ ނިންމާލައިފި
ރައްޔިތުންގެ މަޖިލީހުގައި މިއަދު ބާއްވަން އެޖެންޑާކުރި ޖަލްސާގެ ކޯރަމް ހަމަނުވެގެން ކެންސަލް ކޮށްފިއެވެ.
މިއަދުގެ ޖަލްސާގައި ކޯރަމް ހަމަނުވާތީ ޖަލްސާ ނުފެށި ނިންމާލިކަން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވަނީ ވިދާޅުވެފައެވެ.
“"މިއަދުގެ ޖަލްސާ ފެށުމަށް ބޭނުންވާ ގާނޫނީ އަދަދު، ކޯރަމް ހަމަނުވާތީ އަޅުގަނޑު މިއަދު ރައްޔިތުންގެ މަޖިލީހުގެ ޖަލްސާ މި ހިސާބުން މި ނިންމާލީ” އީވާ ވިދާޅުވިއެވެ.
ކޯރަމް ހަމަނުވެގެން މިއަދުގެ ޖަލްސާ ނިންމާލާފައިވާއިރު، މިއަދުގެ ޖަލްސާގެ އެޖެންޑާގެ އެންމެ ކުރީގައި އޮތީ ސަޕްލިމެންޓަރީ ބަޖެޓު ހުށަހެޅުމެވެ.
މީގެ އިތުރުން, މަޑުއްވަރީ ދާއިރާގެ މެމްބަރު އާދަމް ޝަރީފް ހުށަހެޅުއްވި ރާއްޖޭގެ މަސް ކަނޑުން ގެއްލުނު ބައި ހޯދުމުގެ މަސައްކަތް އަވަހަށް ކުރުމަށް ސަރުކާރަށް ގޮވާލާ ގަރާރުގެ ބަހުސް ވެސް އެޖެންޑާ ކުރިއެވެ.
