މަޖިލީހުގެ އިދާރީ މުވައްޒަފުންގެ ތަކެއްޗަށް ގެއްލުންދިން މައްސަލަ ބަލަން ޑިމޮކްރެޓްސް އިން ގޮވާލައިފި

ރައްޔިތުން މަޖިލީހުގެ އެމްޑީޕީ މެމްބަރުން މިއަދު މަޖިލީހުގެ އިދާރީ މުއައްޒަފުންނާ ކުރިމަތިލާ އެބޭފުޅުންނަށް ގެއްލުން ދީފައިވާތީ އެ އަމަލުތަކުގައި ޖިނާއީ ކުށެއްވާނަމަ ބަލައިދިނުމަށް ދަ ޑިމޮކްރެޓްސް ޕާޓީން ގޮވާލައިފިއެވެ.

Ads by STELCO

ޑިމޮކްރެޓްސް ޕާޓީން ނެރުނު ނޫސްބަޔާނެއްގައި މިހެން ބުނެފައި ވާއިރު، މިއަދު އެމްޑީޕީ މެމްބަރުން ވަނީ މަޖީލީހުގައި ހަމަނުޖެހުން ހިންގާ އިދާރީ މުއައްޒަފުންނާ ކުރިމަތިލާފައެވެ.

އެގޮތުން މަޖިލީހުގެ އިދާރީ މޭޒުން ވިދާޅުވީ މަޖިލީހުގެ ނައިބު ރައީސް އީވާ އަބްދުﷲ ހާޒިރުވެފައި ނުވަނީ ލިޔުމުން ސަލާން ފޮނުވުމަށް ފަހު ކަމަށެވެ. އަދި އީވާ ހާޒިރުވެފައި ނުވާތީ އެމްޑީޕީން ހުށަހަޅާފައިވާ ރައީސް ނަޝީދުގެ އިތުބާރު ނެތް ކަމުގެ މައްސަލަ މިއަދަށް ތާވަލް ކުރި ނަމަވެސް އެ މައްސަލަ ވަނީ މާދަމާ އަށް އެޖެންޑާ ކޮށްފައެވެ.

އެހެން ކަމުން މިކަމަށް އިޝާރަތްކޮށް ޑިމޮކްރެޓްސް ޕާޓީން ބުނީ އީވާ އަބްދުﷲ މަޖީލީހަށް ހާޒިރުވެފައި ނުވާ ސަބަބު މަޖިލީހުގެ އަމީން އާންމު ވިދާޅުވުމާއި ގުޅިގެން އިދާރީ މޭޒު ދޮށަށް އެމްޑީޕީ މެމްބަރުން އެއްވެ ހަޑިހުތުރު އެއްޗެތި ގޮވައި ކައުންސެލް ޖެނެރަލް އަލް އުސްތާޒާ ފާތިމަތު ފިލްޒާގެ އެއްޗެއްސަށް ގެއްލުންދިނުން ހަރު އަޑުން ކުށްވެރި ކުރާ ކަމަށެވެ.

ހަމަ އެހެންމެ މަރަދޫ ދާއިރާގެ އެމްޑީޕީ މެމްބަރު އިބްރާހިމް ޝަރީފް ރިޔާސަތުގެ ސަރަހައްދަށް ވަންނަވައި ރިޔާސަތުގެ ގޮނޑި ކޮޅުގައި އިށީނުމަކީވެސް ވެސް ބަލައިގަނެވޭނެ ކަމެއްނޫން ކަމަށް ޑިމޮކްރެޓްސް އިން ވަނީ ބުނެފައެވެ.

މީގެ އިތުރުން މަޖިލީހުގައި އެމްޑީޕީ މެމްބަރުންގެ އަމަލުތައް މިއަދު ބެހެއްޓެވީ ވަރަށް ނާތަހުޒީބު ގޮތަކަށް ކަމަށާއި،އެފަދަ އަމަލުތައް ނުހިންގުމަށާއި އަދި އެ އަމަލުތަކުގައި ޖިނާއީ ކުށެއްވާނަމަ ބަލައިދިނުމަށް ކަމާބެހޭ މުވައްސަސާތަކަށް ގޮވާލާ ކަމަށްވެސް ޑިމޮކްރެޓްސް އިން ވަނީ ބުނެފައެވެ.