ރައީސް ނަޝީދާ ދެކޮޅަށް އެމްޑީޕީގެ މެމްބަރުން މަޖިލީހުގައި އަޑު އުފުލަނީ
ރައީސް ނަޝީދާ ދެކޮޅަށް އެމްޑީޕީގެ ޕީޖީ ގްރޫޕްގެ މެމްބަރުން ރައްޔިތުންގެ މަޖިލީހުގައި އަޑު އުފުލަން ފަށައިފިއެވެ.
މަޖިލީހުގައި ބެނާ ހިފައިގެން އެމްޑީޕީގެ ޕީޖީ ގްރޫޕުން މިހާރު ދަނީ އަޑުއުފުލަމުންނެެވެ. އެ ބެނާގައި ރައީށސް ނަޝީދަށް އިތުބާރު ގެއްލިފައިވާކަމާއި، އިތުބާރު ގެއްލުމުން އެންމެ ރަނގަޅު ގޮތަކީ އަމިއްލަފުޅަށް އިސްތިއުފާ ދެއްވުންކަމަށް ލިޔެފައިވެއެވެ.
ޕީޖީ ގްރޫޕުން ވަނީ މަޖިލީހަށް މިހާރު ހުށަހަޅާފައިވާ، ރައީސް ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށްޓަކައި ބުރާސްފަތި ދުވަހު ޖަލްސާއެއް ބާއްވައިދިނުމަށް އެދިފައެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިޔަށް ގެންދެވޭނެ ގޮތެއް ހޯދަން އެމްޑީޕީއިން ސުޕްރީމް ކޯޓަށް ވެސް ވަނީ މައްސަލައެއް ހުށަހަޅާފައެވެ. މި މައްސަލައިގެ ފުރަތަމަ އަޑުއެހުން މިމަހުގެ 6 ވާ ހޯމަ ދުވަހުގެ ހެނދުނު 10:00 ތާވަލުކޮށް، އެ އަޑެހުމަށް މިހާރު ވަނީ ޗިޓް ފޮނުވައިފައެވެ.
އެމްޑީޕީއިން ސުޕްރީމް ކޯޓަށް ހުށައެޅި މައްސަލާގައި ވަނީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ތާވަލުކުރާ ޖަލްސާއަށް ނައިބު ރައީސަށް ވަޑައިނުގެންނެވޭ ހާލަތުގައި، މަޖިލީހުގެ ގަވައިދުގެ 44 ވަނަ މާއްދާއަށް އަމަލު ކުރަންޖެހޭ ގޮތަށް މާނަކޮށްދިނުމަށެވެ. އަދި މަޖިލީހުގެ ރައީސްގެ އިތުބާރު ނެތްކަމުގެ މައްސަލާގައި ގޮތެއް ނިންމުމަށް ފަހު ނޫނީ މަޖިލީހުގެ އެހެން އެއްވެސް މަސައްކަތެއް ކުރިއަށް ނުގެންދެވޭނެ ކަމަށް މާނަކޮށްދެއްވުމަށްވެސް އެމްޑީޕީއިން ވަނީ ސުޕްރީމް ކޯޓަށް ހުށައެޅި މައްސަލާގައި އެދިވަޑައިގެންފައެވެ.
