ރައީސް ނަޝީދުގެ އިތުބާރު ނެތް މައްސަލަ: މިއަދުގެ ދެވަނަ ޖަލްސާވެސް ނިންމާލައިފި
ރައްޔިތުންގެ މަޖިލީހުގެ ރައީސް މުހައްނަދު ނަޝީދު މަގާމުން ވަކިކުރުމުގެ ގަރާރު ކުރިއަށް ގެންދަން މިއަދަށް އެޖެންޑާކުރި ދެވަނަ ޖަލްސާވެސް ނިންމާލައިފިއެވެ.
ޖަލްސާ ފެއްޓެވުމަށްފަހު ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބުދުﷲ ވިދާޅުވީ މަޖިލިސް ރައީސްގެ މަގާމުން ރައީސް ނަޝީދު ވަކިކުރަން އެމްޑީޕީން ހުށަހެޅި މައްސަލައަކީ މިއދު ހެނދުނު ބޭއްވި މަޖިލިސް ޖަލްސާއިން ބޭރުކޮށްފައިވާ މައްސަލައަކަށް ވާތީ، ދެވަނަ ފަހަރަށް ފެށި ޖަލްސާ ވެސް އަދި އެ މައްސަލަވެސް ކުރިއަށް ނުގެންދެވޭނެ ކަމަށެވެ.
އިވާގެ މި ނިންމެވުމާ ގުޅިގެން މަޖިލީހުގައި އެމްޑީޕީގެ މެންބަރުން ވަނީ އަޑުގަދަކޮށް ހިތްހަމަނުޖެހުން ފާޅުކޮށްފައެވެ.
ރައްޔިތުންގެ މަޖިލީހުގެ ރައީސް ނަޝީދުގެ އިތުބާރު ނެތްކަމުގެ މައްސަލައިގައި މިއަދު ހެނދުނު 09:30 ގައި ބޭއްވި ޖަލްސާ ނިންމާލީ އެ ޖަލްސާގެ ރިޔާސަތުގައި އިންނެވި މެންބަރު ހަސަން އަފީފެވެ.
އަފީފް ވިދާޅުވީ މަޖިލީހުގައި ކަން ހިނގާ ގޮތަށް ބަލާއިރު ސުޕްރީމް ކޯޓުން މި ނިންމި ނިންމުމުން ވެސް ކަންތައްތަކެއް ބަދަލުވެފައިވާ ކަމަށެވެ. އަދި ހުރިހާ ކަމެއް ވެސް އޮންނާނީ ދެމިގެންދާ ގޮތަށް ގަވައިދުގެ އެހެން މާއްދާތަކާ ވެސް ގުޅިގެންދާ ގޮތަށް ކަމަށެވެ.
އަފީފް އެ ޖަލްސާ ނިންމަވައިލެއްވީ އިތުބާރު ނެތްކަމުގެ ގަރާރު ހުށަހަޅުއްވާފައި އޮތީ މަޖިލީހުގެ ގަވައިދާ ހިލާފަށް ކަމަށް ވިދާޅުވެއެވެ.
