ރައީސް ނަޝީދުގެ އިތުބާރު ނެތް މައްސަލަ މާދަމާގެ ޖަލްސާއަށްވެސް އެޖެންޑާކޮށްފި
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރުނެތްކަމުގެ މައްސަލަ މާދަމާގެ ޖަލްސާއަށްވެސް އެޖެންޑާކޮށްފިއެވެ.
ރައީސް ނަޝީދު ވަކިކުރެއްވުމުުގެ ޤަރާރު ތާވަލުކޮށްފައިވަނީ މާދަމާ 11:00 ޖަހާއިރު ބާއްވާ ޖަލްސާއަށެވެ.
ރައްޔިތުންގެ މަޖިލީހުގެ މާދަމާގެ ޖަލްސާއަށް މަޖިލީހުގެ ރައީސްކަމުގެ މަޤާމުން ރައީސް ނަޝީދު ވަކިކުރެއްވުމަށް ހުށަހަޅުއްވާފައިވާ ޤަރާރު އެޖެންޑާކޮށްފައި މިވަނީ އެ ޤަރާރު ގޯސްކަމަށް ނިންމާ، ރިޔާސަތުން އެ ޤަރާރު ބޭރުކޮށްފައިވަނިކޮށެވެ.
ވިލުފުށި ދާއިރާގެ މެންބަރު ހަސަން އަފީފް ރިޔާސަތާ ހަވާލުވެ، މިއަދުގެ މަޖިލިސް ފެށުމާއެކު، މަޖިލީހުގެ ރައީސް ނިސްބަތްވާ ދަ ޑިމިކޮކްރެޓްސްގެ ފަރާތުން އެ ޕާޓީގެ ލީޑަރު އަލީ އާޒިމް ނެންގެވީ ނިޒާމީ މައްސަލައެކެކެވެ. އާޒިމްގެ ނިޒާމީ މައްސަލައަކަށްވީ މަޖިލީހަށް ހުށަހަޅާފައިވަނީ ގަރާރެއްތޯ ނުވަތަ ބިލެއްތޯ ނުވަތަ ކުއްލި މައްސަލައެއްތޯ ސާފު ކުރުމެވެ.
ކުއްލިއަކަށް އަފީފް މިއަދުގެ ޖަލްސާ ނިންމަވައިލެއްވީ އިތުބާރު ނެތްކަމުގެ ގަރާރު ހުށަހަޅުއްވާފައި އޮތީ މަޖިލީހުގެ ގަވައިދާ ހިލާފަށް ކަމަށް ވިދާޅުވެއެވެ.
އޭގެ ފަހުން 11:30 އަށް އެޖެންޑާ ކުރި ދެވަނަ ޖަލްސާގެ ރިޔާސަތު ބެލެހެއްޓެވި މަޖިލިސްގެ ނައިބު ރައީސް އީވާ އަބުދުﷲ ވެސް ވަނީ މިއީ މަޖިލީހުގެ ރިޔާސަތުން ބޭރުކޮށްފައިވާ މައްސަލައެއްކަމަށް ވިދާޅުވެ، މަޖިލިސް ޖަލްސާ ނިންމަވައިލައްވާފައެވެ.
