ހުވާ ކުރުމުގެ ރަސްމިއްޔާތު ބާއްވާތީ ޖުމްހޫރީ މައިދާން ސަރަހައްދުގެ ޓްރެފިކް ފްލޯއަށް ބަދަލުތަކެއް

ފުލުހުން ބުނީ އެ ރަސްމިއްޔާތަށް ލޯކަލް މާރުކޭޓުން ފެށިގެން ހެންވޭރު ފެރީ ޓާމިނަލާ ހަމައަށް ބޮޑުތަކުރުފާނު މަގުގައި ޕާކު ކުރުން މަނާ ކަމަށެވެ. އަދި ޖުމްހޫރީ މައިދާނުގެ ފަހަތުން އޮންނަ އަމީރު އަހުމަދު މަގުގައި ޕާކު ކުރުން މަނާކޮށްފައިވަނީ، އެމްއެމްއޭ އިން ފެށިގެން ފޮރިން މިނިސްޓްރީ އާ ހަމައަށް ކަމަށެވެ.

މީގެ އިތުރުން މެދުޒިޔާރަތް މަގުގައި ފެންޓަސީ ސްޓޯރުން ފެށިގެން ހޮޓެލް ޖެންއާ ޖެހިގެން އޮންނަ ޕާކިން ޖާގައާ ހަމައަށް ޕާކުކުރުން ވަނީ މަނާކޮށްފައެވެ. އަދި ލޯކަލް މާރުކޭޓުން ފެށިގެން މަސްވެރިންގެ ޕާކާ ހަމައަށް، އެ ސަރަހައްދުގައި ކަނޑުއުޅަނދުތައް ބަނދަރުނުކުރެވޭނެ ކަމަށް ފުލުހުން ބުންޏެވެ.

އިންތިޚާބީ ރައީސް ޑރ. މުޙައްމަދު މުޢިއްޒު ހުވާކުރެއްވުމުގެ ޖަލްސާ އޮންނާނީ މާދަމާ ހަވީރު 16:45 ގައި ޖުމްހޫރީ މައިދާނުގައެވެ. ހުވާކުރެއްވުމުގެ ރަސްމިއްޔާތަށް ޖުމްހޫރީ މައިދާން ތައްޔާރުކުރުމުގެ މަސައްކަތް މިހާރު އަންނަނީ ކުރަމުންނެވެ.