އެމްޑީޕީގެ ވަގުތީ ރައީސަކަށް ރައީސް ޞާލިހް ހަމަޖައްސަވައިފި
އިދިކޮޅު ސިޔާސީ ޕާޓީ އެމްޑީޕީގެ ވަގުތީ ރައީސަކަށް، ކުރީގެ ރައީސް، އިބްރާހިމް މުހައްމަދު ޞާލިހު އައްޔަން ކުރައްވައިފިއެވެ.
އެމްޑީޕީގެ ރައީސް ކަމުގެ މަޤާމު ހުސްވެފައި ވަނީ އެ މަޤާމުގައި ހުންނެވި ކުރީގެ ރައީސް މުހައްމަދު ނަޝީދު އެމްޑީޕީން ވަކިވެ ވަޑައިގަތުމާ ގުޅިގެންނެވެ.
އެގޮތުން އެމްޑީޕީން ރޭ އއ. އުކުޅަހުގައި ބޭއްވި އެ ޕާޓީގެ ޤައުމީ މަޖިލީހުގެ ބައްދަލުވުމުގައި އެމްޑީޕީން ވަނީ އެ ޕާޓީގެ ވަގުތީ ރައީސަކަށް ރައީސް ޞާލިހް އައްޔަންކުރައްވާފައެވެ.
މި ބައްދަލުވުމުގައި ބައިވެރިވި 48 މެމްބަރުންގެ ތެރެއިން 47 މެމްބަރަކު ވަނީ ރައީސް ޞާލިހް ޕާޓީގެ ރައީސް ކަމަށް ގެނައުމަށް ވޯޓު ދެއްވާފައެވެ.
އެމްޑީޕީން ބުނީ ޕާޓީގެ ރައީސަކު ހޮވުމަށް ބާއްވާ އިންތިޚާބު ކުރިއަށް އޮތް މަހެއްހާ ދުވަސް ތެރޭގައި ބާއްވާނެ ކަމަށެވެ.
ރޭ ބޭއްވި އެމްޑީޕީގެ ޤައުމީ މަޖިލީހުން ނިންމި ކަންކަމުގެ ތެރޭގައި ސަރުކާރު ޒިންމާދާރު ކުރުވުމަށް ކޮމެޓީއެއް އެކުލަވާލުމާއި އަދި މަޖިލީހުގެ އިންތިހާބުގެ ކަންކަން ކުރިއަށް ގެންދިއުމަށް ފަސް މެމްބަރުންގެ ކޮމެޓީއެއް އެކުލަވާލުން ހިމެނެއެވެ.
މީގެ އިތުރުން ރާއްޖޭގައި އެތައް ހާސް އިންޑިއާ ސިފައިން ތިބޭ ކަމާއި އެ މީހުން ރާއްޖޭގެ މިނިވަން ކަމާއި ސިޔާދަތު ނަގާލަން ރާވަމުން ދިޔަ ކަމާއި ރާއްޖޭގެ ކަނޑުގެ ސަރަހައްދެއް ވިއްކާލި ވާހަކަ އާއި ދައުލަތް ޝާމިލްވެ ކޮރަޕްޝަން ހިންގި ކަމަށް ބުނާ މައްސަލަތަކެއް ރައްޔިތުންގެ މަޖިލީހަށް ހުށަހަޅައި ޕަބްލިކް އިންކުއަރީއެއް ހަދަން އެމްޑީޕީ ޕީޖީ ގުރޫޕުގައި އެދުމަށްވެސް ފާސްކޮށްފައި ވެއެވެ.
