Monday, 16 November 2026
Advertisement
MWSC — SmartMeter (leaderboard)
ރިޕޯޓް

އުމުރު ދުވަހުގެ ތަޖުރިބާއާއެކު ސޯޝަލް ހައުސިން ސްޓޭންޑާޓް މަތިކޮށްލަން ޙަމްދާން ހުރީ ތައްޔާރަށް

އުމުރު ދުވަހުގެ ތަޖުރިބާއާއެކު ސޯޝަލް ހައުސިން ސްޓޭންޑާޓް މަތިކޮށްލަން ޙަމްދާން ހުރީ ތައްޔާރަށް
ވަރަށް ޅަ, ނަމަވެސް ބޮޑު މަސައްކަތެއް ކުރަމުން އަންނަ ކުންފުންޏަކާ މިއަދު ހަވާލުވެެގެން އެ ހުންނެވީ ޒުވާން ޤާބިލު މެނޭޖިން ޑިރެކްޓަކެވެ. ޙަމްދާން ޝަކީލު, 32އ, މިއަދު އެހުރީ ގިނަ ދިވެހިންތަކެއްގެ އުންމީދުތަކާ ގުޅިފައިވާ ކުންފުންޏަކާ ހަވާލުވެގެންނެވެ. ހަމްދާންއަކީ ފަހި ދިރިއުޅުން ކޯޕަރޭޝަންގެ މެނޭޖިން ޑިރެކްޓަރެކެވެ. ރައީސް ޑރ. މުޙައްމަދު މުޢިއްޒު, ހަމްދާންއާ ފަހި ދިރިއުޅުން ކޯޕަރޭޝަން ހަވާލު ކުރައްވަމުން ދެއްވީ ދެ އިރުޝާދެކެވެ. އެއީ ޓޮޕް ލެވެލްގެ ސޯޝަލް ހައުސިން ފޯރުކޮށްދީ, ކުންފުންޏަކީ ދައުލަތަށް ފައިދާވާ ކުންފުންޏަކަށް ހެދުމެވެ. އެކަން ކުރަން ޙަމްދާން ކުރަހާލި ޕްލޭން "ދެން"އާ ހިއްސާ ކުރިއެވެ. https://youtu.be/1pxAzcK8bNQ?si=GJjH6baiwmKNKTcp ފުރަތަމަ ހަމްދާންގެ ކުޑަ ތައާރަފަކަށް ޖެހިލާނެމެވެ. އެއީ މީސްމީޑިއާ ދަންނަ ފަރާތްތަކަށް ފަރިތަ ނަމެކެވެ. ރައީސް ޑރ. މުޢިއްޒުގެ ކެންޕެއިން ސޯޝަލް މީޑިއާގެ ފަހަތުގައި އޮތީ ހަމްދާންގެ ވަރުގަދަ ބަދަހި ޓީމެކެވެ.  ރިޔާސީ އިންތިޚާބު ކުރިން, ޑރ. މުޢިއްޒުގެ މޭޔަރު އިންތިޚާބު ކުރަން ވެސް މީސްމީޑިއާގައި ޓީމެއް އެކުލަވާލާ ހަރަކާތްތެރިވީ ހަމްދާނެވެ. ރައީސްގެ ސިޔާސަތުތައް މީސްމީޑިއާގެ ވައިގައި ހިއްޕާލާ, ރައްދު ދެއްވަން ޖެހޭ ކަންކަމުގައި ރައްދު ދެއްވާ, ދޫދެއްވަން ޖެހޭ މައްސަލަތަކުގައި ދޫދެއްވަމުން, ރައީސް މުޢިއްޒުގެ ތަސްވީރު މީސްމީޑިއާގައި ކުރަހައިދެމުން ދިޔަ އެއް މޭސްތިރިއަކީ ޙަމްދާނެވެ. ސިޔާސީ މަސައްކަތަށް ބަލާލާއިރު, ޙަމްދާނަކީ ޕީޕީއެމްގެ ނަގާކިޔާލެވޭ މީހެކެވެ. އިދިކޮޅުގައި އޮތްއިރު ބޮޑަށް މަސައްކަތް ކުރެއްވީ ބޭރު ދުނިޔެއާއި އިދިކޮޅު ޕާޓީއާ ދެމެދު އޮތް ގުޅުން ބަދަހި ކުރާށެވެ. ކޯލިޝަންގައި އޮތް ދެ ޕާޓީގެ ފޮރިން ރިލޭޝަން މަސައްކަތެވެ. އެއާއެކުކީ ޒުވާނުންގެ ގޮފީގައި މަސައްކަތް ކުރިއެވެ. ޒުވާނުން ގޮވައިގެން އެ ފަރާތްތަކާއެކު ވަރުގަދަ ސިޔާސީ މަސައްކަތްތަކެއް ކުރެއްވިއެވެ. ސަރުކާރު ބަދަލުވެ, މަޤާމުތަކަށް މީހުން އައްޔަން ކުރެވުނުއިރު ގިނަ ބަޔަކަށް ހީވެފައި އޮތީ ހަމްދާންއާ ހަވާލު ކުރާނީ ފޮރިން ރިލޭޝަންގެ ކަމެއް ކަމަށެވެ. ނަމަވެސް ރައީސް ޑރ. މުޢިއްޒު ނިންމެވީ ހަމްދާންއާ އޭނާ ޙަޔާތް އެކަމަކާ ގުޅިފައިވާ ކޮންސްޓްރަކްޝަން ދާއިރާގެ ކަމަކާ ހަލާލު ކުރާށެވެ. އުމްރާނީ ބިނާކުރުމުގެ ދާއިރާގެ ކުންފުންޏެއްގެ އެންމެ އިސް މަޤާމަށް ހަމްދާން އައްޔަން ކުރެވުނެވެ. [caption id="attachment_207048" align="alignnone" width="690"] ހަމްދާން "ދެން"އަށް މައުލޫމާތު ދެއްވަނީ.. އިމޭޖްސް/ޒައީމް[/caption] ޙަމްދާނަކީ މަޝްހޫރު "ލަތީފް ކޮންސްޓްރަކްޝަން"ގެ އާއިލީ ބޭފުޅެކެވެ. އެންމެ ކުޑައިރު ވެސް ކުރެއްވީ އެ މަސައްކަތެކެވެ. ބައްޕައަކީ ވެސް ކާފައަކީ ވެސް ވަޑިއެކެވެ. ހަމްދާނަށް ލިބިފައިހުރި ހުރިހާ ތަޖުރިބާއެއް ލިބިފައި ހުރީ އެދާއިރާއިންނެވެ. 15 އަހަރުން ފެށިގެން ބައްޕައަށް އަތްގާތް ކޮށްދީ އުޅުނެވެ. އުނގެނި ދަސްކުރީ ވެސް އެ ދާއިރާއެވެ. އޭނާވަނީ މެލޭޝިއާގެ އިންފްރާސްސްޓްރާސްޓަރަކްޗާ ޔުނިވާސިޓީ ކުއާލަލަމްޕޫރު (އައިޔޫކޭއެލް) ގައި ސިވިލް އިންޖިނިއަރިންގެ ދާއިރއިން މަތީ ތައުލީމް ހާސިލު ކުރައްވާފައިވާފައެވެ. ބޭރުގައި ކިޔަވަން އުޅެމުން ވެސް ކުންފުނީގެ އެކި މަސައްކަތްތައް ކުރެއެވެ. ކިރިޔާ ބަންދެއް ލިބުނަސް އައިސް ހުންނަނީ ކޮންމެވެސް ކަމަކާ ހަވާލުވެގެންނެވެ. އެހެންކަމުން ކޮންސްޓްރަކްޝަން ދާއިރާއަކީ ހަމްދާއަށް ފަރިތަ ދާއިރާއެކެވެ. ރައީސް ވިދާޅުވި ކަންތައް އަކުރުން އަކުރަށް ކުރަން ހަމްދާއަށް އެއީ މާ ބޮޑު ކަމެއް ނޫނެވެ.

ސޯޝަލް ހައުސިންގެ ސްޓޭންޑާޑް މަތިކޮށްލަން ތައްޔާރަށް

ޙަމްދާން ހުރީ އެފްޑީސީ ރަނގަޅަށް ހިންގާލަން ތައްޔާރަށެވެ. ކުރިމަތީގައި އޮތީ ދެ ގޮންޖެހުމެކެވެ. އެއްކަމަކީ އެއް ސަރުކާރުން އަނެއް ސަރުކާރުން ވާރުތަވަމުން އައި, ދައުލަތުގެ މާ ބިޔަ ބޮޑު ބިޔަ ދަރަންޏެވެ. ދެވަނަ ކަމަކީ ނިމިދިޔަ ސަރުކާރުން ނުހިއްކާ, ނުނިންމާ އޮތް ދީފައި އޮތް ފްލެޓް ލިސްޓެވެ. ޙަމްދާން ދެއްވީ ދެކަމަށް ވެސް ކުންފުނި ތައްޔާރަށް އޮތްކަމުގެ ޔަޤީންކަމެވެ. "ރައްޔިތުންނަށް ލިބެން ޖެހޭ އެއްޗެއް އަޅުގަނޑުމެން ނިގުޅައެއް ނުގަންނާނަން. ފްލެޓްތައް އަޅުގަނޑުމެން އަޅާ, އެތަންތަން ހަވާލުކުރާނަން" ޙަމްދާން ވިދާޅުވިއެވެ. ޙަމްދާންގެ ޓާގެޓަކީ މި ފަސް އަހަރުގެ ތެރޭގައި ސޯޝަލް ހައުސިންގެ ސްޓޭންޑާންޓް މަތިކޮށްލުމެވެ. މީގެ ކުރިން ސޯޝަލް ހައުސިންއޭ ކިޔާ ރައްޔިތުންނަށް ޖެއްސި ބުރަ ދެވަނަ ފަހަރަށް ތަކުރާރުވިޔަ ނުދިނުމެވެ. "ޔުނިޓްތައް ހޭންޑް އޮވާ ކުރުމަށްފަހު އަޅުގަނޑެއް ބޭނުމެއް ނޫން, ދެން އަނެއްކާ އެތާ ފާޅުތައް ތަޅާ, ރާނާ ސިމެންތި ޖަހާ, މި ހުރިހާ އަޑުތަކެއް ރައްޔިތުންނަށް އިވޭކަށެއް. އަޅުގަނޑުމެން ޔުނިޓްތައް ހަވާލުކުރާއިރު ހުންނާނީ ހުރިހާ މަސައްކަތެއް ނިމިފައި. އޭގެ އިތުރަށް އަސާސީ ޚިދުމަތްތައް ލިބޭ ގޮތަށް މި ޑިޒައިން ކުރަނީ" ހަމްދާން ވިދާޅުވީ, ރާއްޖޭގެ ދިރިއުޅުމުގެ ފެންވަރު ރަނގަޅު ކުރުމަށް ހިންގާ މިފަދަ ޕްރޮޖެކްޓްތައް ޓޯޓަލް ފިނިޝިންއަކާއެކު ނިންމާދޭނެ ކަމަށެވެ. އެފްޑީސީން މިވަގުތު ކުރަމުން ދަނީ ޖުމްލަ 4,000 ފްލެޓްގެ މަސައްކަތެވެ. އެއީ 17 އަދި 18 ބުރީގެ ޖުމްލަ 32 ޓަވަރެވެ. މި ޕްރޮޖެކްޓަކީ 3.5 ބިލިޔަން ރުފިޔާގެ ޕްރޮޖެކްޓެކެވެ. މަސައްކަތް ކުރަމުން އަންނަނީ ހުޅުމާލޭ ފޭސް ދޭއްގައެވެ.

ފެބްރުއަރީއަށް ހަތަރު ޓަވަރު ނިންމާލަނީ

ފަހި ދިރިއުޅުމުން ޓަވަރުތައް އިމާރާތް ކުރަނީ ކޮންސްޓްރަކްޝަންގެ އާއްމުކޮށް ބޭނުން ކުރާ ޓްރެޑިޝަނަަލް މެތޮޑާއި ޚިލާފަށް ޓެކްނޮލޮޖީއެއް ބޭނުންކޮށްގެންނެވެ. އެއީ ރެއިންފޯސްޑް ކޮންކްރީޓް މެތޮޑެވެ. މިކަން މިހެން ކުރުމުން އާއްމުކޮށް ފްލޯއެއްގެ ކޮންސްޓްރަކްޝަން މަސައްކަތް ހޭދަވާ ދުވަސް މަދުވެއެވެ. އޭގެ އިތުރަށް އެފްޑީސީން ދަނީ ކޮންސްޓްރަކްޝަން އިތުރަށް އަވަސް ކުރުމަށް ކުރެވޭނެ ކަންތައްތައް ވިސްނާ އެކަންތައް ކުރަމުންނެވެ. "އެންމެ ފަންޑަމެންޓަލް ލެވެލްއިން ފެށިގެން އެންމެ ޓޮޕް ލެވެލްއާ ހަމައަށް އަޅުގަނޑުމެން މިދަނީ އިވެލުއޭޓް ކުރަމުން ކުދިކުދި ކަންކަން އެޑަޕްޓްކޮށްލީމަ މި އަންނަނީ ވަރަށް ބޮޑު އިންޕެކްޓެއް ޕްރޮޖެކްޓްގެ ޓައިމްލައިނަށް". ހަމްދާން ވިދާޅުވިއެވެ. "މިސާލަކަށް ސައިޓްގައި އުފެދޭ ކުނިބުނި, ތިލަފުއްޓަށް ގެންދަން ކުރިން އޮތް ޝެޑިއުލަށް ބަދަލު ގެނައީމާ މި ވާގޮތަކީ ސައިޓް ހުސްވަނީ, މިއީ އިތުރު މެޓީރިއަލް ގެނެސް, އިތުރު ޓަވަރުތައް އެކްސަލަރޭޓްކޮށްލުމަށް ލިބޭ މަގެއް" އެފްޑީސީން މަސައްކަތް ކުރަނީ ވީހާ ވެސް އަވަހަށް ޓަވަރުތައް ނިންމާ, ހަވާލު ކުރާށެވެ. އެފްޑީސީގެ ފުރަތަމަ ހަތަރު ޓަވަރުގެ މަސައްކަތް އަންނަ ފެބްރުއަރީ މަހަށް ނިމޭނެއެވެ. ހަމްދާން ބޭނުންވަނީ އެ މުއްދަތަށް އިތުރު އެއްޓަވަރު ނަމަވެސް ނިންމާށެވެ. އެކަމަށް ކުރަން ޖެހޭ މަސައްކަތް ހަމްދާނާއި އޭނާގެ ޓީމުން ދަނީ ކުރަމުންނެވެ. "އިއްޔެ ވެސް އަޅުގަނޑު ކޮންޓްރެކްޓަރަކާ ވާހަކަ ދެއްކީ, އެއްޓަވަރު ނަމަވެސް އެ ޓައިމްލައިންއާ ފިޓްކޮށްލާފައި" ޙަމްދާން ވިދާޅުވިއެވެ. އެފްޑީސީގެ ހުންގާާނުގައި ޙަމްދާން ހިފައިގެން އެހުރީ އެ ކުންފުނި ދަތުރު ކުރާނެ, ކުރަން ބޭނުންވާ މަގު ރަނގަޅަށް ވިސްނައިގެންނެވެ. ރައީސް މުޢިއްޒު ހަވާލުކުރެއްވި ބޮޑު ޓާސްކް ފުރިހަމަ ކުރަން ތައްޔާރަށެވެ. ލިބިފައިވާ ތައުލީމާއި ތަޖުރިބާއަށް ބަލާ އޭނާއަށް އެއީ މާބޮޑު ކަމެއް ނޫނެވެ. ޙަމްދާންގެ އޮތީ ވަރަށް ސިންޕަލް އެއިމްއެކެވެ. އެއީ ސްޕީޑް ވިތްއައުޓް ކޮންޕްރޮމައިޒިން ކޮލިޓީއާއެކު, ވީހާ ވެސް އަވަހަށް ވީހާވެސް ގިނަ ބަޔަކު ގެދޮރުވެރި ކުރުވުމެވެ. އަދި ސަރުކާރުގެ އީ ކުންފުނީގެ ލިސްޓުން ނަގާ, އެފްޑީސީ ބޮޑުކޮށް, މި ފަސް އަަހަރުގެ ތެރޭގައި ކެޓެގަރީ ސީގެ ކުންފުންޏަކަށް އެ ކުންފުނި ހެދުމެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.