ޓެކްސް ފައިސާއިން އަރާމުކޮށް ގޮނޑި ހޫނުކުރުމަކީ ރައީސް މަސްޢޫލިއްޔަތުން ފެއިލްވުން: ޖަމީލް
ޓެކްސް ފައިސާއިން އަރާމުކޮށް ގޮނޑި ހޫނު ކުރުމަކީ ރައީސުލްޖުމްހޫރިއްޔާގެ މަސްއޫލިއްޔަތުން ފެއިލްވުން ކަމަށް ވިދާޅުވެ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު، ރައީސް އިބްރާހިމް މުހައްމަދު ސޯލިހުއަށް ވަރަށް ބޮޑަށް ފާޑު ވިދާޅުވެއްޖެއެވެ.
މިކަމާއި ގުޅިގެން ޖަމީލް ކުރެއްވި ޓްވީޓުގައި ވިދާޅުވީ މުހައްމަދު ނަޝީދު އިސްތިއުފާ ދެއްވީ ބަޑިޖައްސައިގެން ކަމަށް ވިދާޅުވި އިރު ގިނަ މައްސަލަތައް އޮތީ ބަންޑުންވެފައި ކަމަށެވެ. އެގޮތުން ގައުމު ވިއްކުމާއި، ދީނަށް ގޮންޖެހުމާއި، ތަކެތީގެ އަގު އުފުލުމާއި އަދި ފަނޑިޔާރު ވަގަށް ނެގުމުގެ މައްސަލަތައް ޖަމީލް ފާހަގަކުރެއްވިއެވެ.
އަދި މިއަދުގެ ސަރުކާރުން ވެސް އެކަންކަން ކުރަމުންދާ ކަމަށާއި އެ ތާރިޙުތައް އިއާދަވާ ވާ ކަމަށާއި ވައްކަން ޢާންމުވެ ޒިންމާދާރު ނުކުރެވޭ ކަމަށް ޖަމީލް ވިދާޅުވިއެވެ.
" ޤަޢުމުގެ އިސްތިގްލާލް ދޫކޮށް ދީނަށް ގޮންޖެހުން ދިރުވަނީ. ފަނޑިޔާރުން ބިރުވެރިކަމެއްގައި. އެއްޗެހީގެ އަގުބޮޑުވެ ރައްޔިތުން ބަނޑަށްޖެހެނީ. ބަޔަކު ބުނާތީ ޓެކްސް ފައިސާއިން އަރާމުކޮށް ގޮނޑި ހޫނުކުރުމަކީ މަޞްޢޫލިއްޔަތުން ފެއިލްވުން. ރައްޔިތުންގެ އިޙްތިޖާޖުގެ އަޑަކީ އިސްތިޢުފާ" ދާދި ފަހުން އިދިކޮޅު ކޯލިޝަނާއި ގުޅިވަޑައިގެންނެވި ޖަމީލްގެ ޓްވީޓުގައި ވިދާޅުވިއެވެ.
ގައުމުގެ ހަރު މުދާ ވިއްކުމާއި، ސައިކަލް ޖޫރިމަނާ އަދި ޒުވާނުންނަށް މި ސަރުކާރުން ކޮށްދޭން ވައުދުވީ ކަންކަން ކޮށްދީފައި ނުވާތީ އެކަމާއި ދެކޮޅަށް އަޑު އުފުލުމަށް އިއްޔެ ހަވީރު ޕީޕީއެމް،ޕީއެންސީގެ ކޯލިޝަނުން ބޭއްވި ސައިކަލު ބުރަށް ރައީސް ސޯލިހު ވަނީ ފާޑު ވިދާޅުވެފައެވެ. އެގޮތުން އިސް ފަރާތްތަކެއް އިސްވެ ތިބެ މާލޭގައި އެޗްޕީއޭގެ އެންގުމާ ހިލާފަށް މުޒާހަރާ ކުރުމުން ހިތާމަ ކުރައްވާ ކަމުގައި ރައީސް ވިދާޅުވިއެވެ.
