އުއްމީދަކީ ނުހޮވޭ ބޭފުޅުން ވެސް އެކަތިގަނޑަކަށްވެ މަސައްކަތް ކުރުން: ރައީސް މުޢިއްޒު
އުއްމީދަކީ މިއަދު ބޭއްވި ކޮންގްރެސް ޕާޓީގެ މަޖިލިސް ޕްރައިމަރީން ހޮވޭ ބޭފުޅުންނާއެކީ ނުހޮވޭ ބޭފުޅުންވެސް އެކަތިގަނޑަކަށް ވެގެން މަސައްކަތް ކުރުން ކަމަށް ރައީސުލްޖުމްހޫރިއްޔާ، އަދި ކޮންގްރެސް ޕާޓީގެ ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ އެ ކޯލިޝަނުގެ މަޖިލިސް ޕްރައިމަރީގެ ވޯޓުލުން ކުރިއަށްދާ ގޮތް ބެއްލެވުމަށް މިއަދު ހެންވޭރު ދަނޑަށް ވަޑައިގެން މީޑިއާތަކާ ވާހަކަދައްކަވަމުންނެވެ.
ރައީސް މުޢިއްޒު ވިދާޅުވީ ރައްޔިތުންގެ ތާއީދާއެކު ކުރިއަށް އޮތް މަޖިލިސް އިންތިހާބުގެ ސުޕަރ މެޖޯރިޓީ ކާމިޔާބު ކުރައްވާނެ ކަމަށެވެ. މަދުވެގެން 62 ގޮނޑި ކާމިޔާބު ކުރައްވާނެ ކަމަށް ރައީސް ވަނީ ވިދާޅުވެފައެވެ.
ރައީސް އިތުރަށް ވިދާޅުވީ, އެމަނިކުފާނުގެ އުއްމީދަކީ މިއަދުގެ މި ޕްރައިމަރީ ނިމުމުން ދެން ހޮވޭ ހުރިހާ ބޭފުޅުންނާއެކީގައި ނުހޮވޭ ބޭފުޅުންވެސް އެންމެން އެކަތިގަނޑަކަށް ވެގެން ކުރިއަށް އޮތް މަޖިލިސް އިންތިޚާބު ކާމިޔާބު ކުރުމަށް މަސައްކަތް ކުރުން ކަމަށެވެ.
ނަމަވެސް ޕްރައިމަރީގެ ނާކާމިޔާބީއާއި އެކީގައި އަމިއްލަ ގޮތުން ކެނޑިޑޭޓުން ވާދަކުރާކަން ފާހަގަކުރައްވާ ރައީސް ވިދާޅުވީ އެ ކަމަކީ ޕާޓީއަށް ގިނަ ގޮނޑިތަކެއް ގެއްލިދާނެ ކަމެއް ކަމަށެވެ.
އެހެން ކަމުން އެގޮތަށް އެކަންވިޔަ ނުދިނުމަށްޓަކައި ބަލިވާ ކެނޑިޑޭޓުން، މޮޅުވާ ކެނޑިޑޭޓުންނާއެކު ކުރިއަށްދިއުމަށް މި ފަހަރު އެއްބަސްވުމެއް އެކުލަވާލާފައިވާ ކަމަށް ރައީސް ވަނީ ވިދާޅުވެފައެވެ.
މީގެ އިތުރުން ކޯލިޝަނުން ބޭނުންވަނީ ދެފުށް ފެންނަ ހަމަހަމަ އިންތިހާބެއް ބާއްވަން ކަމަށާއި، މި އިންތިޚާބާއި ގުޅިގެން ހުށަހަޅާ ޝަކުވާތައް އިންސާފުވެރިކަމާއެކު ބައްލަވާ ހައްލުކޮށްދެއްވާނެކަމަށް އެ ރައީސް ވަނީ ވިދާޅުވެފައެވެ.
ޕްރޮގްރެސް ކޮންގްރެސް ކޯލިޝަނުގެ މަޖިލިސް އިންތިޚާބުގެ ޕްރައިމަރީގައި 73 ދާއިރާ އަކަށް 283 ކެންޑިޑޭޓުން ވާދަކޮށްފައި ވެއެވެ. މި އިންތިޚާބުގައި ވޯޓު ދިނުމުގެ ހައްގު ލިބިފައިވާ މީހުންގެ އަދަދު 70 ހާހުން މައްޗައް އަރައެވެ.
އަހަރެމެން މިތިބީ ހަމަ ސަރުކާރާއެކު އިންޝާ ﷲ މަޖިލީހުގެ ސުޕަ މެޖޯރިޓީ ލިބޭނެ