ކޮޅުމަޑުލުގައި މިއަހަރުގެ ތެރޭގައި ރިސޯޓެއް ތަރައްޤީ ކުރަނީ
ކޮޅުމަޑުލުގައި މިއަހަރުގެ ތެރޭގައި ރިސޯޓެއް ތަރައްޤީ ކުރައްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުޢިއްޒު މިފަދައިން ވިދާޅުވީ އާންމުންނަށް ރައީސާ ސުވާލުކުރެވޭ ގޮތަށް ކުރިއަށް ގެންދާ ''ރައީސްގެ ޖަވާބު'' ގައި އާންމުންގެ މީހަކު ކުރެއްވި ސުވާލުގެ ޖަވާބުގައެވެ.
އެ ފަރާތުން ވަނީ ތ. އަތޮޅަށް ޓޫރިޒަމް ފުޅާވެ ރިސޯޓްތައް އިތުރުވާނެތޯ ސުވާލު ކޮށްފައެެވެ. އެގޮތުން ތ. އަތޮޅުގައި 13 ރަށް ހިމެނޭއިރު ފަތުރުވެރިކަމަށް ޤާއިމްކޮށްފައިވަނީ އެންމެ ރަށެއްގައި ކަމަށް އެ މީހާ ބުންޏެވެ. ތ. އަތޮޅުގެ އިތުރު ރިސޯޓެއް މި ދައުރުގައި ހުޅުވިގެންދާނެތޯ އޭނާ ވަނީ އައްސަވާފައެވެ.
އެ ސުވާލުގެ ޖަވާބުގައި ރައީސް ވިދާޅުވީ މި ދައުރުގެ ތެރޭގައި ތ. އަތޮޅުގައި ގިނަ ރިސޯޓްތަކެއް ތަރައްގީކޮށްދެއްވާނެ ކަމަށެވެ. އޭގެތެރެއިން އެއް ރިސޯޓް މިއަހަރު ތެރޭގައި ތަރައްގީ ކުރާނެ ކަމުގެ ޔަގީންކަން ރައީސް ދެއްވިއެވެ.
''5 އަހަރު ތެރެއަށް ބަހާލައިގެން ގިނަ ރިސޯޓް މުޅި އަތޮޅުގެ އެކި ހިސާބަށް އެދި ދާއިރާތައް ކަވަރުވާ ގޮތަށް ގެނެސްދޭނަން" ރައީސް މުއިއްޒު ވިދާޅުވިއެވެ.
ރައީސް ވިދާޅުވީ ރާއްޖޭގެ އެކި ސަރަހައްދުތަކުގައި އެއާޕޯޓު އިތުރުކުރުމަކީ އެމަނިކުފާނުގެ ތަސައްވުރެއް ކަމަށާއި މުޅި އިގްތިސާދަށް ގެންނަން މަސައްކަތްކުރަމުންދާ ބަދަލާއެކު ރާއްޖޭއަށް އަންނަ އިންވެސްޓަރުން ވެސް ގިނަވެގެންދާނެ ކަމަށެވެ.
Ads by STO
